KHAWTHLIR

Minister hlui Lalbiakzuala a thi

Mizoram sorkara minister of state hlui Lalbiakzuala (67) h/o Lalhmingduhawmi, Chaltlang chu nimin zing dar 4:25 khan a thi a, nimin chawhnu dar 2 khan vui a ni. Lalbiakzuala hi kum 1993 inthlanpuiah Congress party ticket-in Khawhai bialah MLA atan thlan tlin a ni a, sorkar term laklawha ministry sîksawi a nih ṭumin minister of state atana lak luh a ni a, Environment & Forest leh department dangte a enkawl a ni.

Inthlan thlir lêt

Kolasib district election officer John LT Sanga, bawrhsap hoin nimin khan DC conference hall-ah inthlanpui kaihhnawiha sector officer, flying squad team leh static surveillance team leader-te'n Kolasib district-a inthlanpui kalpui dan an thlir let. DEO chuan MPF, kohhran leh tlawmngai pawlte hmalakna leh election official-te an thawhpuina chu inthlan felfai chhan pakhat a nih thu a sawi. Ṭhukhawm chuan inthlan vuakveta an thil tawn hrang hrangte aṭanga hmasawnna tur rawtna an neihte an sawi bakah, bawhzui ngai turte an sawiho a ni.

PYD-in thisen pe

PYD (North East India), Haulawng Pastor Bial chuan November 13, Thawhṭanni khan thisen pek an huaihawt a, Lunglei Civil Hospital tan thisen unit 58 an pe a, petute mipa 46 leh hmeichhia 12 an ni.

Secretary thi

Mizoram sorkara secretary ni lai J Hmingthanmawia (57) s/o Prof. Siamkima, Venghlui chu nimin chawhnu dar 1:15 khan cancer vangin a thi a, vawiin chhun dar 12-ah vui a ni ang. J Hmingthanmawia hi MCS a ni a, IAS-ah hlan kai tawh niin, AMGUT 2010 batch a ni. A thih ni thleng hian Mizoram sorkarah secretary a ni a, District Council & Minority Affairs a enkawl a ni.