Mara rama missionary Pi Violet-i a thi

Mara rama missionary hmasa ber Rev. Reginald Arthur Lorrain tunu Rev. Violet Louise Annie Mark (85), Pi Vaili tia koh ṭhin chu nimin zing dar 8:20 khan Saikao (Serkawr)-a an inah a thi a, November 15, naktukah vui a ni dawn.

Violet-i hi hun eng emaw ti aṭang khan a páwnchhuak tawh lo a, damdawi-inah enkawl a lo ni zauh zauh tawh ṭhin a, nimin khan chatuan ram a pan ta a ni. A ruang hi a duh apiang en theih turin Saikao-a Mission Compound-ah dah a ni a, naktukah Serkawrah vui a ni ang.

Mara Autonomous District Council sorkar chuan Violet-i vui ní November 15 chu a hnuaia thawkte tan chawlh (holiday)-ah a puang a; MADC huam chhungah ni sarih chhung (November 13-19) intihhlim lam chi rêng rêng huaihawt khap a nih thu a puang bawk.

Rev. RA Lorrain leh a nupui Moud Louise Ullander Lorrain te chuan Pathian thu hril turin kum 1907 khan Mara ram an thleng a, Serkawrah awmhmun khuarin Pathian thu an hril a ni. An fanu Marquirite Lorrain (a Mara hminga Tlosa) chu Mara rama missionary tho Albert Bruce Foxell nen an innei a, fa pakhat Rev. Violet Louise Annie Mark an nei.

April 16, 1938-a piang Violet-i hi kum 1968 khan Rev. L Mark nen an innei a, an chhungkua hian an ramah haw tawh loin Serkawrah an awm hlen a ni.