MLA inthlanpuiah vote 82.43% a tla

Mizoram MLA General Election, November 7, 2023-a neih leh nimina Muallungthu polling station-a vote thlak nawn a nih hnua electronic voting machine (EVM) bika vote tla zat chu 80.66% a ni a, November 6, 2023 thlenga postal ballot-a vote tlate nen 82.43% a tling.

Mizoram Election department chuan Muallungthu PS-a vote thlak ṭhat a nih hnuah EVM-a vote tla zat a tichhuak a; Mizoram pumah voter 8,52,088 zinga 6,87,334 (mipa 3,30,627 leh hmeichhia 3,56,707)-in vote an thlak a, chu chu 80.66% a ni.

November 6, 2023 thlengin postal ballot hmangin vote 15,061 a tla a; postal ballot-ah hian inthlan buaipuitu polling official-te leh mahni in lama vote thlaktu kum upate leh pianphunga rualbanlote an ni. Postal ballot-a vote tlate leh EVM-a vote tlate chu 7,02,395 a ni a, voter zat 8,52,088 aṭangin 82.43% a tling. Vote tla zatah hian service voter-te vote thlak chhiar tel a la ni lo.

Tarlan tawh angin, South Tuipui biala polling station pahnih - Aithur PS (voter 116) leh Lungpuitlang PS (voter 106)-ahte vote nei zawng zawngin vote an thlâk vek a; constituency anga vote tlak ṭhatna ber chu Tuikum bial niin, 87.32% a tla. Vote tlak ṭhatna ber bial chu Thorang niin, 88.19% a tla a, vote tlak chhiatna ber Aizawl East-II bialah 75.46% a tla a; district anga vote tlak ṭhatna ber Serchhip district-ah 84.75% a tla a ni.

Vote thlâkna EVM-te chu strong room-ah dah luh vek tawh niin, vote chhiar huna hawn turin nghet taka kalh a ni a, uluk takin chhun zan zawma ven a ni ang. Vote tlate hi Election Commission of India (ECI)-in a duan lâwk angin December 3, 2023-a chhiar turin inbuatsaihna kalpui zel a ni.