CAMPAIGN VÃWRTAWP KHA!
A KAMKÉUNA
Oct. 9, 2023-a ECI-in a puan angin 9th Mizoram State Assembly elections chu Chhattisgarh, MP,, Rajasthan & Telangana-te nen November 7, 2023-ah a ruala vote thlak tura tih kan ni a; ruahman lãwk ang chuan Dec. 3, 2023 (Sunday)-ah vote chhiar a ni ang. Kum dangah chuan Mizoram State Assembly inthlan hun hi November ni sawmhnih hnu lamah neih ṭhin a ni a, kuminah erawh November thla tir téah ECI-in a ruat avangin Political party tin leh Independent Candidate-te an inpeih hman lovin an buai phili phah hle. Hetiang a nih avang hian inthlan kaihhnawiha thil ṭul leh buaipui ngaite chu hnawhsarum taka buaipui a ngaih phah a, Mizoram State election department lam pawh an inralring hman bik lova mawngvawmba ang seka an chèt a ngai ve tho va, a ṭhente phei chu an tlaivár hial hlawm nia hriat a ni.
A VÃWRTAWP NI KHA!
Tun ṭum inthlan chu hnawhsarum taka inbuatsaih a ngaih avangin Political party-te ṭhahnemngaihna a nasa tlang hle a. MPF lam pawh duhthusamin a inpeih bik lem lo niin a lang. Poster, pamphlet, leaflet, banner leh inthlan kaihhnawih hmanraw pawimawh dang dang chhutu leh buaipuitu, offset printers & printing press etc. lamte pawh an tlaivar deuh zak zak hlawm ni berin a lang.
Kan hriat ṭheuh angin political party tinte an vir buaiin an hmanhlel hle a, ṭhahnem an ngai tlang hle. Nov. 5, 2023 (4:00pm) Sunday tlai thleng kha campaign vãwrtawp ni mah se, kristiante ni thianghlim chawlhni a nih avangin a hma ni Nov. 4, 2023 (4:00pm) Inrinni tlai thleng khan political party tinte'n an campaign office-ah leh khawi emaw hmun remchang apiangah campaign kharna inkhawm an huaihawt a, an boruak a ṭhain an vaw hawt thei hlawm hle. A hun lai a nih bakah ṭan a na bawk a, sum leh therhlo sem lo tura MPF ngenna pawhin awmzia vak a nei lo niin a lang.
Khami tlai khan campaign vãwrtawp kharna political party hrang hrangin an buatsaihte paltlangin thil ṭul dang vangin ka kal nual a; an khawlai titi leh chetzia ngun takin ka ngaihven a. Ṭhenkhat chuan an candidate-te leh Party worker-te hnen aṭanga pocket money an dawn avanga an lãwm thu leh, a ṭhen chuan an dawn ve loh avanga thinrima ha chang ṭhial bap bap paha áng bawrh bawrhte pawh an awm bawk. Zurui leh ruihhlo dang kãi chi chiai hmuh tur lah an tam ngang mai! Kawngpeng ṭhuam lûn lai tak pakhatah phei chuan tlangval zurui ve ve 2 wheeler khalh ve ve intãwk, inhmu thiam lo, intingeng ve ve bawk si kawng inkian ṭha duh lo ve ve bawk si, inmelh rum, insual ngam tak tak si lovin rei ve kawng an dãl a, traffic police leh police dang veivak pawh an awm bawk si lo nen, khami tlai zet kha chu kan pui hut hut hle mai.
Sum a vãng a, kan khawro tlang rei tawh bawk a, political party hrang hrangin pocket money an han sem zet kha chu campaign vãwrtawp khãrna inkhawm tual vel zawng zawng kha chu, Amawii purfume rim hlira khatin a nam vung vung mai a, pawisa an lo ngah hlawm hle niin a lang.
A TLÃNGKAWMNA
Inthlanpui meuh hi chu a pawimawhin ṭan a na bawk nen, campaign tir lam leh joint platform campaign laia eiru lo tura insawi leh, sum sem lo tura intiam ṭhinte hian a tak ram an han dai meuh chuan insum a har tlang a ni ang, an insawi rinawm ang lo hlirin an khawsa leh si ṭhin a ni. Thingtlang khaw ṭhenkhatah phei chuan insual buai phah an awm nual niin sawi a awm. Politic la na deuh khaw ṭhenkhatah phei chuan pafa inhnawt chhuak leh chhungkaw inhmu thiam lo an awm nual niin sawi a awm bawk.
Dec. 3, 2023 vote chhiar ni a lo thleng ang a, a ṭhen an lãwmin an hlim hle ang a, a ṭhen erawh an hlim lo vang a, an inbengkun ang a; an nguai hle bawk ang. Result chhuah hma hi chuan inrinsiak hun lai a ni a, intluk tlãn lai a nih avangin tute tan pawh a nawm hun lai tak a ni. Result puan hnu, ministry thar a din hunah campaign hun laia an intiamna kha Zoram mipuiin tehfung atan an hmang leh ngei dawn a ni a, chuvangin, tute pawhin ministry thar lo chelh pawh ni se, mipuiin kan pawm tlãn thiam a ngai ang a, MLA thlan tlinte pawhin mipui hmaa an tih tur sawite leh an intiamnate kha mipui bum nan maia hmang lovin, a takin nunpui ngei thei tawh se a lawmawm hle ang. Engpawhnise, kãr lovah mipui tam zawk thutlūkna a lo lang mai dawn a, dawh thei takin i lo nghak phawt mai teh ang u.
-Dr. C. Lalrampana