Vanglaini - IMI 2.0 leh IPPI kalpui dan tur sawiho

KHAWTHLIR

JNU beih duh lohna MZU-ah lantir dawn

Mizoram University Teachers' Association (MIZUTA)chuan vawiin hian MZU Park-ah 'Peaceful demonstration against JNU attack' an huaihawt dawn a, January 5, 2020-a misual rualin Jawaharlal Nehru University (JNU), New Delhi an beih duh lohna lantirin zirtirtu leh zirlaite an pung khawm dawn. He hunah hian pawl panga - MIZUTA, MUNTSA, MZU Students' Council, MZU Alumni leh JNU Alumni aiawhte'n thu an sawi ang.

Thisen pe

Mizoram police-a CID (Special Branch) leh CID (Crime) chuan Mizoram police din champha pualin nimin khan blood donation camp an huaihawt a, Aizawl Civil Hospital tan mipa 37 leh hmeichhia pakhatte'n thisen unit 38 an pe. Serchhip Chanmari Vengthar Branch KṬP pawhin nimin khan Serchhip District Hospital tan thisen unit 11 an pe a, a petute hmeichhia paruk leh mipa panga an ni.

CAB/CAA tihnêp Tumnaah ngai

MPC party ṭhalai chuan thuchhuah siamin, Zoramthanga kaihhruai Mizoram sorkarin zu zawrh chungchang an vawrh chhuak chu Citizenship Amendment Bill (CAB) boruak tihdahlauna hmanrua atana an tih nia an ngaih thu an tarlang a, "CAA laka mipui rilru hruai kâwi an tumna mai a nihzia a tilang chiang hleah kan ngai a, ṭul miah loa mipui rilru tichî-âi zawnga hmalakna sim tawh turin Pu Zoramthanga kan beisei," an ti.

Joint CEO thar

Mizoram sorkar chuan Printing & Stationery controller David Liansanglura Pachuau chu joint chief electoral officer (Joint CEO) atan a ruat a; Printing & Stationery controller atan hian Angela Zothangpuii a ruat nghal. Officer pahnih sîksawina thupek hi nimin khan tihchhuah a ni.

Minister-in enfiah

Champhai Zotlang khaw hmun hluia Botanical Garden siamna tura ruahman chu nimin khan Environment Forest and Climate Change minister TJ Lalnuntluanga'n a enfiah. Botanical Garden hi Mizoram chhunga thing leh mau awmte humhalh a, awlsam taka hmuh mai theih tura phochhuahna hmun tur a ni a, mipui vantlang tana lenkhawthawnna leh zirna pui theitu tura ruahman a ni.

DAWNTISEI

IMI 2.0 leh IPPI kalpui dan tur sawiho

Kolasib District Task Force on Immunization Committee chu nimin khan DC pisaah an chairman Sangchhin Chinzah, district bawrhsap hoin an ṭhukhawm a; an district-a Intensified Mission Indradhanush 2.0 (IMI) leh Intensified Pulse Polio Immunization Programme (IPPI) kalpui tawh dan leh hlâwk zawka kalpui zel dan tur an sawiho.

Sangchhin Chinzah chuan, mipuiin hri danna lâk an ngaih pawimawh theih nan hri danna lâk pawimawhzia an hriat chian hmasak a ṭul thu a sawi a; sorkar department dangte nen thawkho a, hlawk zawka IPPI kalpui turin a chah.

District immunization officer Dr RK Lalthlamuana'n kum 2019 chhunga IMI 2.0 leh IPPI kalpui dan a sawi a, IPPI chu January 21, 2020 aṭanga kalpui leh tur a nih thu a sawi.

Report-a tarlan danin, Kolasib district-ah IMI 2.0 thawh khatnaah hri danna pek tur bituk zat aṭangin naupang 87.32% leh nu nau pai 100% hnenah hri danna pek a ni a, a thawh hnihnaah naupang 87.87% leh nu nau pai 200% hnenah pek leh a ni. IPPI thawh khatnaah booth, transit leh house to house visit kaltlangin naupang kum nga hnuai lam 9,491 hnenah hri danna pek a ni.

Share this Post

Login to comment

No Comments