In tina tui pek chungchang sawiho

Khawzawl District Water and Sanitation Mission Committee chu an chairman K Lalrohlua, bawrhsap kaihhruaiin nimin khan an ṭhukhawm a; Jal Jeevan Mission (JJM) hnuaia in tina tui pek hna la zawh fel lohna khua pali - Kawlkulh, Vanchengpui, Chhawrtui leh Riangtleiahte December 15, 2023 hmain zawh fel tum ni se an ti.

Ṭhutkhawmah hian Khawzawl district-a khaw tin open defecation free (ODF) plus model village-a hlàn kai thuai a nih theih dan tur leh JJM hnuaia hmalak chhunzawm zel dan turte sawiho a ni.

JJM hnuaia in tina tui pek (Har Ghar Jal) chu Khawzawl district-a khaw 21-ah pek tawh a nih thu tarlan a ni a; Har Ghar Jal la zawh lohna khua paliahte December 15, 2023 hmain pek fel tum ni se, tiin an rêl.

Páwn lama inthiar an awm lohna tura hmalaknaah Khawzawl district-a thingtlang khaw 25 zinga 24 chu ODF Plus an ni tawh a, ODF Plus la ni ve lo Neihdawn khua pawh Integrated Management Information System-a thawn (upload) fel loh vang a nih thu tarlan a ni bawk.