Champhai DCC leh DLRC ṭhukhawm

Nimin khan Champhai DC pisa conference hall-ah District Consultative Committee (DCC) & District Level Review Committee (DLRC) chu district bawrhsap SL Naveen kaihhruaiin an ṭhukhawm.

Champhai DC chuan, mipuite’n bank kaltlanga hamṭhatna an chhawr ṭangkai theihna turin banker-te a zau thei ang bera zirtirna nei turin a chah a, undivided Champhai district tana ‘Potential Credit Linked Plan (PLP) 2020-2021’ buatsaih chu a tlangzarh nghal.

Meeting-a tarlan danin, September quarter zawh thlenga Champhai district-a bank hrang hrangte credit deposit (CD) ratio chu 45.03% a ni a, CD ratio bituk zat (target) 60% a pha lo.

Priority sector atana loan pek chhuah chu 66.45% a ni a, commercial bank tana bituk 40% a khûm. Agricultural segment hnuaiah loan 17.49% pek chhuah a ni a, target 18% a tling lo. Export, Education and Housing loan chu 41.09% a ni a, education loan pek chhuah a awm loh laiin, housing loan pek chhuah chu 46.28% a tling.

Kum 2019-20 chhunga Prime Minister Employment Generation Scheme (PMEGP) hmanga Champhai district-a target 64 aṭangin mi 14 hnenah September 2019 thlengin loan cheng nuai 135.77 pek chhuah a ni a; Pradhan Mantri Awas Yojana (PMAY) hnuai target 150 zinga mi pasarih hnenah loan cheng nuai 22.09 pek a ni bawk.

Pradhan Mantri Mudra Yojana (PMMY) hnuaiah mi 84 (Shishu-28, Kishor-46, Tarun-10) hnenah loan cheng nuai 197.55 hû pek a ni a, DAY-NULM hnuaiah self help group (SHG) target 359 zinga 104 hnenah cheng nuai 107.43 loan pek niin, loan recovery percentage chu 20.23% a ni. DAY-NULM hnuaia target 65 zinga mi 30 hnenah loan cheng nuai 41 pek a ni thung.

Champhai district-ah SHG 24 saving account hawn a ni a, a hmaa mi nen a vaiin SHG saving bank account 702 hawn a ni tawh. Non Performing Assets (NPA) account 2,319 awmin, a hlutna chu cheng nuai 3,975.83 a ni. Thingtlang mite tana bank hman dan zirtirna Digital Financial Literacy Awareness Programme vawi ruk neih a ni a, Financial Literacy Camp vawi 25 neih a ni.

Social Security Scheme hnuaiah bank kaltlangin cashless transaction Pradhan Mantri Suraksha Bima Yojana (PMSBY) hnuaiah mi 651, Pradhan Mantri Jeevan Jyoti Bima Yojana (PMJJBY) hnuaiah mi 492, Atal Pension Yojana (APY) hnuaiah mi 16 ziah luh thar a ni bawk.



Share this Post

Login to comment
No Comments