Vanglaini - MSU-in Lalrawnliana thih dan an dem

KHAWTHLIR

JNU beih duh lohna MZU-ah lantir dawn

Mizoram University Teachers' Association (MIZUTA)chuan vawiin hian MZU Park-ah 'Peaceful demonstration against JNU attack' an huaihawt dawn a, January 5, 2020-a misual rualin Jawaharlal Nehru University (JNU), New Delhi an beih duh lohna lantirin zirtirtu leh zirlaite an pung khawm dawn. He hunah hian pawl panga - MIZUTA, MUNTSA, MZU Students' Council, MZU Alumni leh JNU Alumni aiawhte'n thu an sawi ang.

Thisen pe

Mizoram police-a CID (Special Branch) leh CID (Crime) chuan Mizoram police din champha pualin nimin khan blood donation camp an huaihawt a, Aizawl Civil Hospital tan mipa 37 leh hmeichhia pakhatte'n thisen unit 38 an pe. Serchhip Chanmari Vengthar Branch KṬP pawhin nimin khan Serchhip District Hospital tan thisen unit 11 an pe a, a petute hmeichhia paruk leh mipa panga an ni.

CAB/CAA tihnêp Tumnaah ngai

MPC party ṭhalai chuan thuchhuah siamin, Zoramthanga kaihhruai Mizoram sorkarin zu zawrh chungchang an vawrh chhuak chu Citizenship Amendment Bill (CAB) boruak tihdahlauna hmanrua atana an tih nia an ngaih thu an tarlang a, "CAA laka mipui rilru hruai kâwi an tumna mai a nihzia a tilang chiang hleah kan ngai a, ṭul miah loa mipui rilru tichî-âi zawnga hmalakna sim tawh turin Pu Zoramthanga kan beisei," an ti.

Joint CEO thar

Mizoram sorkar chuan Printing & Stationery controller David Liansanglura Pachuau chu joint chief electoral officer (Joint CEO) atan a ruat a; Printing & Stationery controller atan hian Angela Zothangpuii a ruat nghal. Officer pahnih sîksawina thupek hi nimin khan tihchhuah a ni.

Minister-in enfiah

Champhai Zotlang khaw hmun hluia Botanical Garden siamna tura ruahman chu nimin khan Environment Forest and Climate Change minister TJ Lalnuntluanga'n a enfiah. Botanical Garden hi Mizoram chhunga thing leh mau awmte humhalh a, awlsam taka hmuh mai theih tura phochhuahna hmun tur a ni a, mipui vantlang tana lenkhawthawnna leh zirna pui theitu tura ruahman a ni.

DAWNTISEI

MSU-in Lalrawnliana thih dan an dem

January 11, 2020 chhuna A Lalrawnliana (31) s/o A Lalhmuaka, Bungtlang South thihna chungchangah MSU chuan thuchhuah siamin, Lalrawnliana chu hnam dang (Mizo ni lo) kut tuara thi ni ngeia an ngaih thu leh, Mizoram chhunga ram leilung fate'n hnam dang kut an tuar leh ṭhin chu hriatthiam har an tih thu an tarlang.

MSU Gen.Hqrs. chuan, "Pawi khawihtu hi a rang lama man a, dan anga na taka hrem turin sorkar kan phût. Tualthattute man chhuah an nih hma chu MSU-in a ṭul angin hma a la dawn a, ram leilung fate'n hnam dang kut an tawrh tawh loh nan a ṭul ang zelin hma kan la dawn a ni," a ti.

MSU tarlan danin, A Lalrawnliana bo chungchangah hian January 8-ah Vaseikai Police Station-ah FIR thehluh a ni a; mahse, Vaseikai PS-ah thawktu pathum chiah an awm a, pahnihin chawlh (leave) an lâk lai a nih avangin pakhat chiah tan chhui zui hna thawh chak theih a ni lo. MSU chuan A Lalrawnliana thihnaa inhnamhnawihte man thuai tura sorkar an phût bakah, Vaseikai PS-ah hna thawk thei tur khawp thawktu dah turin Mizoram sorkar an ngen a ni.

Share this Post

Login to comment

No Comments