Tun hnai khan A Lalrawnliana (31) s/o A Lalhmuaka, Bungtlang South, Lawngtlai district chu a zinna Vaseikai khuaah thia chhar a ni a, mi kut tuara thi ni ngeia rin a nih avangin nimin khan Bungtlang South khaw mi eng emaw zat chu Vaseikai khuaah an kal a, buaina lian chhuak lo mah se, in 51 a chhia nia sawi a ni.

A Lalrawnliana vuinaa a chan­chin ziahnaa a lan danin, A Lalrawnliana hi January 3, 2020 (Zirtawpni) khan Nghalimlui khuaah W Muana hriatrengna lungphuna tel turin a kal a, tluang takin a thlenga hriat a nih laiin, January 4 (Inrinni) zing aṭangin a awmna chin hriat a ni lo.

A chanchin hriat tumin a chhungte chu Bungtlang South aṭangin January 7 khan Nghalimluiah an kal a, chanchin hriat tur a awm loh avangin January 8 aṭangin Nghalimlui leh Vaseikai YLA-te punin an zawng ta a ni. Khawtlangin an zawn aṭanga a ni lina, January 11 chhun dar 12 velah thia hmuh a ni.

A Lalrawnliana taksaah sawi­sakna hnûhmá a awm avangin mi kut tuara thi a nih rin a ni a, hei vang hian Bungtlang South khaw mipui an lungawi lo hle a, mi eng emaw zat (300 vel) chu nimin khan Vaseikai khuaah an kal.

Lawngtlai aṭanga thu dawn dan­in, Bungtlang South khaw mite Vaseikaia an kal avang hian intih­buaina lian tham a thleng lo a; chu­tihrualin, khaw chhung kawng­pui dunga in 51 chu tihchhiat (a bang tile tihkeh) a ni. Vaseikai leh Nghalimlui te hi khaw inzawm a ni.

Share this Post