KMMTTP kawng siamtute chawlhtirtu LDLOA hruaitute police-in an man

Kaladan Multi Modal Transit Transport Project (KMMTTP) hnuaia Lawngtlai aṭanga Myanmar ram pawh tur kawngpui sial hna thawk mektute an hnathawh chawlhsan tura thu petu Lawngtlai District Land Owners Association (LDLOA) hruaitu mi pasarih chu nimin khan police-in an man.

Lawngtlai aṭanga thu dawn danin, LDLOA hruaitute chu an president H Remmawia hoin nimin khan KMMTTP kawng siam mekah hna thawh a nih leh nih loh enfiahin an kal a; Lawngtlai po­lice-te'n an lo man a, an hriselnate endik an nih hnuah Lawngtlai Police Station-ah hren an ni.

Police hotute chuan, LDLOA hruaitute chu 'Preventive arrest' an nih thu leh, hnathawh kal lai tiṭhuanawp zawnga hma an lak avanga hrèn rih an nih thu an sawi.

LDLOA hruaitute man an nih hnu hian LDLOA chuan an hruaitute police-in an hrên chungchangah Lawngtlai Police Station-ah nimin khan FIR an thehlut ve nghal a ni.

Lawngtlai District Land Owners Association hian January 13, Thawh-

ṭanni khan Executive Committee meeting an ko a, an pawl office bearer meeting-in KMMTTP kawngpui siam hna thawh mek chawlhtir an lo rèl tawh chu an nemnghet a ni. Thawhṭanni vêk khan kawngpui siam hna thawktu company-te chu nimin January 14 aṭanga tiam chin awm loa chawlhsan turin an hriattir nghal a; hna an thawh luih chuan an chungah eng pawh thleng se, LDLOA mawh a nih loh tur thu an hrilh bawk.

LDLOA hriat danin, KMMTTP kawngpui sialnaah hian zangnadawmna la pek loh mi 303 an la awm a, chu'ng mite sum hmuh tur belhkhawm chu cheng nuai 5,800 chuang a ni. LDLOA chuan, zangnadawmna an hmuh tur chu pe thuai turin sorkar an phût a, sorkar kar nan kawng siamtu company-te hna thawk lo turin an hriattir a ni.

Police-in LDLOA hruaitu an mante

1.H Remmawia, President

2.T Zatluanga, Secretary

3.ST Biakchungnunga, Treasurer

4.A Hmingthanzuala, Asst. Secretary

5.K Vanlalthlira, Asst. Secretary

6.Jonathan, Committee member

7.K Saidanga, Committee member




Share this Post

Login to comment
No Comments