Vanglaini - Zirna quality ṭhatna turin theihtawp kan chhuah mek

KHAWTHLIR

JNU beih duh lohna MZU-ah lantir dawn

Mizoram University Teachers' Association (MIZUTA)chuan vawiin hian MZU Park-ah 'Peaceful demonstration against JNU attack' an huaihawt dawn a, January 5, 2020-a misual rualin Jawaharlal Nehru University (JNU), New Delhi an beih duh lohna lantirin zirtirtu leh zirlaite an pung khawm dawn. He hunah hian pawl panga - MIZUTA, MUNTSA, MZU Students' Council, MZU Alumni leh JNU Alumni aiawhte'n thu an sawi ang.

Thisen pe

Mizoram police-a CID (Special Branch) leh CID (Crime) chuan Mizoram police din champha pualin nimin khan blood donation camp an huaihawt a, Aizawl Civil Hospital tan mipa 37 leh hmeichhia pakhatte'n thisen unit 38 an pe. Serchhip Chanmari Vengthar Branch KṬP pawhin nimin khan Serchhip District Hospital tan thisen unit 11 an pe a, a petute hmeichhia paruk leh mipa panga an ni.

CAB/CAA tihnêp Tumnaah ngai

MPC party ṭhalai chuan thuchhuah siamin, Zoramthanga kaihhruai Mizoram sorkarin zu zawrh chungchang an vawrh chhuak chu Citizenship Amendment Bill (CAB) boruak tihdahlauna hmanrua atana an tih nia an ngaih thu an tarlang a, "CAA laka mipui rilru hruai kâwi an tumna mai a nihzia a tilang chiang hleah kan ngai a, ṭul miah loa mipui rilru tichî-âi zawnga hmalakna sim tawh turin Pu Zoramthanga kan beisei," an ti.

Joint CEO thar

Mizoram sorkar chuan Printing & Stationery controller David Liansanglura Pachuau chu joint chief electoral officer (Joint CEO) atan a ruat a; Printing & Stationery controller atan hian Angela Zothangpuii a ruat nghal. Officer pahnih sîksawina thupek hi nimin khan tihchhuah a ni.

Minister-in enfiah

Champhai Zotlang khaw hmun hluia Botanical Garden siamna tura ruahman chu nimin khan Environment Forest and Climate Change minister TJ Lalnuntluanga'n a enfiah. Botanical Garden hi Mizoram chhunga thing leh mau awmte humhalh a, awlsam taka hmuh mai theih tura phochhuahna hmun tur a ni a, mipui vantlang tana lenkhawthawnna leh zirna pui theitu tura ruahman a ni.

DAWNTISEI

Zirna quality ṭhatna turin theihtawp kan chhuah mek - Education Minister

School Education minister Lalchhandama Ralte chuan, Mizoramah zirna ṭha tak a awm theihna turin theihtawp chhuaha hma an lak mek thu a sawi.

Vanglaini palai zawhna chhangin Lalchhandama Ralte chuan, exam system tihtawp tawh chu an kalpui leh tawh thu a sawi a, "Tunah hian zirlaite tan inelna sang zawk a awm theihna atan pawl 10 leh 12-ah chauh ni lo, tun hmaa tih ṭhin angin board exam-te neih leh a ṭha em tih ngaihtuah mek a ni. Kawng dangah pawh zirna ṭha a awm theihna atan theihtawp kan chhuah," a ti.

School Education Minister sawi danin, board exam kalpui leh pui loh chungchangah thutlukna siam a la ni lo a, Mizoram pum angin nge, district level-in kalpui a nih ang tihte sawiho a ni a, zau zawka inràwn khawm zel tum a ni.

Share this Post

Login to comment

No Comments