Manipur tualchhung buaina vangin Mizo 151 an thi tawh - Zo United

Manipur buaina vanga Zo hnahthlak pawl hrang hrangte inzawmkhawmna, Zo United hruaitute tarlan danin, Manipur tualchhung buaina vangin Zo hnahthlak mi 151 an thi tawh.

Zo United hruaitute leh NGO Coordination Committee hruaitute chu nimin khan Central YMA Hall-ah an inkâwm a; Zo United hruaitute chuan, Manipur-a buaina vanga Zo hnahthlakte'n an tawrh dan hrang hrang an sawifiah.

NGO Coordination Committee chairman Lalhmachhuana, CYMA president chuan, Zo hnahthlakte tawrhna a tawp mai dawn loa a lan avangin kawng tinrengah fei a ngaih thu a sawi a; teirei peih tur leh rinawm taka pawl kaihruai turin Zo United hruaitute a fuih.

Lalhmachhuana chuan Zo United hruaitute thlamuanin, "Mizoram mipuite'n kan theihtawpin kawng engkimah kan ṭanpui zel ang che u," a ti.

Zo United hruaitute chuan, kawng tinrenga anmahni ṭanpui a, an hnung dâwm tlattu Mizorama Mizo mipui chungah an lawm thu an sawi a; theihtawpa ṭanpui zel tur leh an hmelmate laka ṭangho zel turin Mizo mipui leh pawl hruaitute an ngen a ni.

Ṭhutkhawma Zo United hruaitute sawi danin, May 3, 2023-a Manipur-a tualchhung buaina a chhuah hnuah Zo hnahthlak khua 203 hâl a ni tawh a, chenna in 8,166 hâl niin, mi 151 an thi tawh.

Chenna in nei lote tan relief camp 200 siam a ni a, chenna in nei lo mi 50,000 chuang an ni tawh. Relief camp-a awm zinga mi 42 an thi tawh a ni.