Tlungvelin an khuain an chhawr ve dawn loh vangin Solar plant siam hna thawk mekte an chawlhtir

Tlungvel khawtlang chuan an khaw ram, Khawkum hmuna Power Solar Plant siam mek chu Tlungvel khuain an chhawr ve loh tura tih a nih avangin nimin khan lungawi lohna an lantir a, solar plant siam hna thawk mekte hnathawh an chawlhtir.

Tlungvel All NGO Committee hotute sawi danin, Tlungvel Power Solar Plant siam hna hi kum 2018-ah thawh ṭan niin, kawlphetha megawatt 2 siam chhuak thei tura ruahman a ni a, a siamtu ZEDA-in an siam zo ṭep tawh. Solar Plant aṭanga kawlphetha siam chhuah chu Grid (11kv line)-ah thlun zawm­in, Thingsulthliah leh Chhing­chhip sub-station-ahte pek luh tura ruahman a ni.

Tlungvel NGO hruaitute chuan, Solar Plant bunna atana an khaw ram ṭha lai ber an pek chhan chu Tlungvel khuain an chhawr ve ngei tura an inngaih vang a nih thu an sawi a, "December 21, 2018-a a lungphùm phùm ní pawhin department hotute'n direct-a Tlungvel tana pek a nih tur thu an sawi laiin, hna zawh tawh dawn thleng pawha hmalakna a awm si loh vangin NGO hruaitute'n hnatlang neiin, hnathawk mekte chu chawlhtir a ni. Kan lungawina anga hmalakna awm hma chu hna thawh ṭan leh kan remti lo," an ti.

An sawi danin, solar plant chu Tlungvel khuain direct-a an chhawr ngei theih nan Tlungvela V/C, NGO leh political party angin ṭum nga thuneitute an dàwr tawh a ni.

Tlungvel NGO-te chuan nimin vek khan resolution an siam a; "Tlungvelin kan ram neih ṭhat ber Khawkum ram Solar Power Plant atana kan pek hi ni 21.12.2018-a P&E Minister leh Secretary ten min tiam anga Tlungvelin direct-a chhawr theih tura hmalakna a awm zui loh avangin, March 2020 thlenga Tlungvelin direct-a kan chhawr theih tura hmalakna/hnathawh a awm loh chuan he solar plant hi hmun dangah sorkarin sawn chhuak mai se kan ti. Kan duh anga hmalakna a awm hma chu hnathawh lai pawh chhunzawm kan remti lo," an ti.



Share this Post

Login to comment
No Comments