DAY-NLUM hnuaiah home 9 ṭanpui

Lunglei High Powered Committee (HPC) vice chairman Lawmawma To­chhawng, MLA chuan nimin khan Lung­lei Convention Centre-ah Deendayal Antyyodaya Yojana National Urban Livelihood Mission (DAY-NLUM) hnuai­a khawpuia mirethei dâwmkanna atan Lungleia home pakua hnenah ṭanpuina sum leh bungrua a sem.

Lawmawma Tochhawng chuan, sorkar ruahmanna a taka thlentirtu leh hamṭhatna dawngtu home an awm chu vanneihthlak a tih thu sawiin, "Kristiante dam chhan chu Isua hnathawh chhunzawm a nih angin, khawpuia tlûk luhna hre lo leh chhanchhuah ngai, mihring pangngaia buatsaihtu in awm hi a thlamuanthlak a ni," a ti.

Lunglei HPC Vice Chairman chuan, home enkawltute chu an hnathawh ṭhate chhunzawma ṭan la zel turin a chah a; Lunglei HPC aṭangin home hrang hrangte tan thawh chhuah aṭanga pung thei chi a tahtawla kalpui tum a nih thu a sawi bawk.

DAY-NLUM hmanga home ṭanpuina hi sum faiin TNT hnenah Rs. 7,080,00, Chhawmdawlna Inah Rs. 96,000, Mercy Home-ah Rs. 24,000, WADA-ah Rs. 48,000 leh Women Shelter (WADA)-ah Rs. 1,80,000 pek a ni a; heng home-te leh home dang - BCO, Special Home, KK Home leh Bethel Centre hnenah bungraw hrang hrang pek a ni bawk. Sum faia pek zawng zawng chu Rs. 10,56,000 a ni.



Share this Post

Login to comment
No Comments