District-ah post poll scrutiny neih a ni

Nimin khan district hrang hrangah Mizoram inthlanpui neih zawh tak thlirlêtna leh endikna, post poll scrutiny neih a ni.

Post poll scrutiny-ah hian inthlana thil fel lo complaint awmna polling station te, EVM kaih­hnawiha harsatna thlenna te, vote thlaktu nihna fiahna atana EPIC aia identity card dang hmang 25% aia tam an awmna te, constituency khata vote tlak dan chawhrual aia 15%-a tamna/tlemna polling station te, ECI-in enfiah ngai criteria a siam anga enfiah ngai polling station-te dinhmun zir chian a ni ṭhin.

Kolasib-ah chuan Kolasib College-ah general observer Anant Lal Gyani hoin post poll scrutiny neih a ni a; DEO John LT Sanga, Tuirial bial atana returning officer Melody Ngurthantluangi, Serlui bial tana returning officer Lalmuan Puia leh assistant returning officer-te leh political party aiawhte bakah, police observer S Chaitanya leh micro observer-te an tel.

Kolasib district-a assembly constituency pathuma zir chian ngai polling station-te chu thlirho a ni a, thil felhlel leh rinhlelhawm a awm lo tih pawm a ni.

November 7, Thawh­lehnia inthlan vote thlakah Kolasib district chhungah EVM/VVPAT kháwl chiang lo thlak ngai pali a awm. Polling station pahnihah vote thlak ṭan hmaa enchhinna (mock poll) laiin VVPAT chiang lo thlak a ni a; PS pakhatah mock poll kalpui laiin EVM ballot unit thlak a nih bakah, vote 17 a tlak tawh hnua VVPAT thlakna PS pakhat a awm bawk. EVM/VVPAT thlakna PS-ahte hian harsatna dang thleng loin tluang takin vote thlak zawh a ni.

Khawzawl DC pisaah an district-a assembly constituency awm chhun Tuichang biala inthlan leh a kaihhnawihte general observer Amit Singh Bansal hoin enfiah a ni a; Khawzawl bawrhsap leh returning officer K Lalrohlua, assistant returning officer Lalṭhakima Chhangte leh Lalhruaitluangi bakah, nodal officer te, sector officer-te leh political party aiawhte an tel. Tuichang biala polling station 28-ah a bika enfiah ngai a awm lo tih tarlan a ni.

Hnahthialah pawh DC pisaah post poll scrutiny neih a ni a, South Tuipui biala general observer Mohammad Qaiser Abdulhaque leh returning officer Lalvenhima-te'n an ho. South Tuipui biala assistant returning officer pahnih Neng Thianlala leh Betty Lalrinfeli bakah, sector officer pathum leh party aiawhte an tel a; video-a cover vek a ni.

Ṭhutkhawmah hian General Observer chuan South Tuipui biala polling station ṭhenkhat felhlel lai awm theia langte chu Form-A (register of votes), presiding officer’s diary leh document dang pawimawhte nen a endik a; political party aiawh kal khawmte nen an pawm tlân vek avangin scrutiny hi tluang taka zawh a ni.