Aizawl North-II bialtu MLA Dr Vanlalthlana chuan January 9-11, 2020 chhunga Young Chorei Association (YCA) Ge­neral Conference vawi 20-na, Khawdungsei, North Tripura-a neih chu a hmanpui.

YCA conference-ah hian Dr Vanlalthlana chuan, Mizoram chhung leh páwna Mizo hnah­thlak awm zawng zawngte an inpumkhat a ṭul thu sawiin, "Mizo hnam hrang hrang zinga inpumkhat duhna lian zel hi thil lawmawm tak a ni a, hnam anga kan din chhuahna atan pawh thil ṭul tak a ni," a ti a; YCA member-te uar lehzuala zirna kalpui tur leh fimkhur taka nun kawng zawh turin a fuih.

YCA hruaitute chuan, Chorei hnam bakah, Sakechep, Langrawng, etc.-te chu Tripura lama Zo hnahthlak awmte an ni a, Mizoram gazette-ah Mizo hnam anga an awm loh avangin schedule tribe dinhmun chungchangah harsatna an tawh avangin, hma laksak turin MLA hi an lo ngen a ni.

YCA General Conference-ah hian an member India ram state hrang hranga branch 50 aṭang­in mi ṭhahnem tak an tel a ni.

Share this Post