Kan MP hi CAB kan vote tir - MNF Vice President

MNF vice president Lalthlengliana chuan, sorkar laipuiin Mizoram a duhsak a, Mizoram chu Citizenship (Amendment) Act (CAA) huamtir a nih loh avangin Mizoram Lok Sabha MP C Lalrosanga chu CAB an vote tir thu a sawi.

Nimina Lungleia Mizo Hnam Run hawnna inkhawmah thu sawiin Lalthlengliana chuan, "Politics boruak pakhat CAA 2019 hi MNF chuan kan duh lo a, kan do a, kan do zel ang. Kohhran zawng zawng, NGO leh party zawng zawngin kan duh lo a, kan Chief Minister leh MP Pu C Lalrosanga pawhin Prime Minister, Home Minister-ah nasa takin an bei a ni," a ti.

MNF Vice President chuan, an duh loh ang ngei leh an ngen angin Mizoram chu CAA huam­tir a ni ve lo tih sawiin, "Kan lawm hle. Heti khawpa min duhsak a, min telh tâk loh avangin kan party duh dan angin MP pawh kan vote tir a ni," a ti a; engmah thil hre chiang lo, ram tana ni khat pawh pên chhuak ve lo, powder inhnawih paw chawpa râk ve vak vakte chu engah mah ngai lo turin an party mite a chah.

Lalduhoma, MLA chungchang sawiin Lal­thlengliana chuan, "Politics-ah pawl 11 pass tawh a ni a, a telna pawl tawh phawt chu ṭha ber anga lantir tumin a tàwpah pawl chhe ber a ni zel. Kan party-a a awm vete kha kan buai char char phah a, a chhuak chiah kha hnára hlît phawi ang huai a ni. Vice president pawh pasarih a nei tawh a, amah hi inkawl chhâwk chia piang ni berin ka hria," a ti.

MPCC president Lalthanhawla chung­chang pawh sawiin MNF Vice President chuan, "Pu Hawla lah hi chawlh a tum a, a châwl leh phal si lo. Mahse, Pathian mit nautê a khawih tawh tlat avangin tho leh tur a awm tawh lo. Bible meuh pawhin milem be suh a ti. Coconut sawh keha nupaa vai pathian hmaa chal hnawihsena pawi khawihtu a ni," a ti a; Pathian pawisawi chu thil hlauhawm tak a nih thu a sawi.



Share this Post

Login to comment
No Comments