Hyderabad an vannei

Thawhlehni zan khan Indian Super League inkhelah tun season ISL-a chak la nei miah lo Punjab FC leh Hyderabad FC an intawng a, an record duhawm lo an chhawm nung zel - team pahnihah chak zawk an awm lo a, 1-1 in an inhnehtawk.

I League champion Punjab tan Juan Mera chuan minute 82-naah inkhela goal hmahruai a khung a, goal luh hun leh team pahnih intiat tawkzia thlirin Hyderabad an tlawm mai dawn nia rinna a lian hman.

Mahse, Thangboi Singto enkawl team hian a tlawm bik nih duh loin, hun pek belh minute riatnaah Jonathan Moya goal khung hmangin si phurh an sut a, hun a tawp meuh chuan 1-1 in inkhel an ṭin.

Punjab tan Brandon VL Remdika chu bench aṭanga luhtir a ni a, Hyderabad tan Mark Zothanpuia chuan inkhel bul a ṭan thung. ISL hi chawlh rih a ni dawn a, November 25-ah an khel ṭan leh chiah ang.