Nimin khan Law & Judicial minister TJ Lalnuntluanga chuan India leh Myanmar inkalpawhna leh insumdawntawnna hmun Zokhawthar tlawhin Immigration Check Post buatsaih leh Integrated check post siamna tura pawimawhte a enfiah a, Immigration Check Post chu rei loteah kalpui ṭan tum a nih thu a sawi.

Law Minister chuan ramri kaltlanga insumdawntawnna chungchanga harsatna awm ṭhinte sorkarin a hriat reng thu sawiin,"Sutkian aniha dan ang taka kalpui anih theihna turin bawhzui zel a ni. Dan ang taka inkalpawhna mumal tak a awm theih nan Immigration Check Post reiloteah kalpui ṭan tum a ni," a ti.

State sorkarin nikum February thla aṭangin sorkar laipui a dawr tih sawiin TJ Lalnuntluanga chuan, "Nikum lamah district thuneitute nen Myanmar lama Immigration Check Post te chipchiar taka tlawha zirchian a ni," a ti a, sorkar aiawhten Moreh, Manipur-a lntegrated Check Post-te an zirchian tawh thu a sawi.

TJ Lalnuntluanga chuan dan anga sumdawnna kalpuia zalen taka insumdawntawnna kalpui chu sorkar duh dan a nih thu sawiin, "Zokhawthar police outpost, police station puitlinga hlankai a ni chuan venhim hna kalpui kawngah awmzia thui tak a neih ka beisei," a ti.

Minister ṭawiawmtu Champhai DC SL Naveen chuan Zokhawthara ramri kaltlanga inkalpawhna leh insumdawntawnna mumal zawk siam anih theihna tur kawngah district administration-in a tih ve theih angahte tha thawha ṭawiawm a inhuam reng thu a sawi. 

Commerce and Industries joint director HD Rintluanga pawhin thu sawiin, Immigration check post bunte, Land Custom Station tichangtlunga Integrated Check Post a hlangkaite chu sorkar ngaih pawimawh a nih thute a sawi a,"Integrated Check Post-ah chuan Food Testing Lab, Plant Quarantine, Animal Quarantine or Check Post, weight bridge leh hmanraw dang dangte dah tur a ni," a ti.

Share this Post