Mizoram Journalists' Association (MJA) General Headquarters chuan kum thar tira an tih ṭhin angin nimin khan Aizawl Press Club-ah kum 2020 puala thingpui inhona hun an hmang a, tun hnaia MJA member atana lak tharte lawm luh nghal an nih bakah, January 7-12 chhunga press tour-a telte zin report ngaihthlak a ni.

Inkhawm hi MJA vice president Lalremsiama'n a kaihruai a; thusawitu MJA president Zonunsanga Khiangte chuan, kum 1972-a din MJA-in Pathian hruaina a dawng nasa hle tih sawiin, "Kan hnate rim taka thawh a ngai chungin, hriselna ṭha kan nei thei hi Pathian awmpuina a ni a, journalist-te leh MJA-te'n a ṭha zawngin hma kan sawn hle a ni," a ti a; hriselna ṭha nen ṭha taka hna an thawh theih nan nun uluk turin MJA member-te a chah.

MJA President chuan, kum 2019 kha MJA chanchina press tour-a an chhuah tam ber ṭum a nih thu leh press tour ṭum riat neih a nih thu a sawi a, "Kumin January leh February thlaah hian team khat ve ve chhuak tura ruahman mek a ni. Press tour min buatsaihsaktu Mizoram sorkar hotute chungah kan lawm hle a ni," a ti.

Inkhawmah hian MJA Executive Committee ṭhukhawmin MJA member atana an lak thar Aizawla awmte lakluhna hun hman a ni.

Share this Post