Mohammedan chakna Mizo

Mohammedan SC chuan an mual Naihati Bankimanjali Stadium-ah Trau chu 6-0 zetin an sawp a, Kolkata club goal ruk zinga goal li hi Mizo player-te khung a ni. November 7, Thawhlehni zan inkhelah hian David Lalhlansanga'n goal hmasa pahnih khungin Lalremsanga Fanai leh Samuel Lalmuanpuia'n te goal hnuhnung pahnih an khung ve bawk.

Tun season I League-ah Mohammedan SC hian match thum aṭangin point sarih an hmu a, hmahruaitu an ni mek. Kolkata club-ah Mizo paruk an awm a, Zodingliana Ralte (Adinga) chu tlarhnungah player pawimawh a ni. Goalkeeper Lalbiakhlua Jongte leh Vanlalzuidika Chhakchhuak te erawh bench-ah an ṭhu thung.

Aizawl FC chhul chhuak tia sawi theih Vairengte tlangval David hian kumin nipui bazarah Mohammedan SC hi a zawm a, Calcutta Football League-ah goal 21 ngawt a khung bakah Durand Cup-ah match thum lek khelin goal ruk a khung.

I League ṭan hma hian Mohammedan ṭantuten David-a hi an ngaina tawh a, a club hlui Aizawl FC a hmachhawn ṭuma bench aṭanga a tlan luh pawhin thawm ring tak an siam. Shillong Lajong an hmachhawn ṭumin bench aṭang bawkin David hi a lut a, sutna goal a khung. Russian manager Andrey Chernyshov-a'n Trau an hmachhawn ṭumin David hi bul a ṭantir a, minute 10 chhungin goal hnih a khung nghal - Mohammedan boss hian goal khung thei striker hi a duhsak chhunzawm ngei ang.