New Zealand hmalam hun a hriat dawn

Vawiin tlai dar 2:00 hian M. Chinnaswamy Stadium, Bangalore-ah New Zealand leh Sri Lanka te an inkhel dawn a, Cricket World Cup hnuhnung bera finalist Kane Williamson-a hote tan chak ngei ngei a ṭul dawn.

Inkhelhna tur Banga-lore hi batter-te tual chaina tiin an sawi theih. Australia leh Pakistan inkhelh ṭum khan a chak zawk Aussies-in 367 runs tehmeuh an siam a, a chak lo zawk Shaheens pawhin 305 runs an siam.

M. Chinnaswamy Stadium hi New Zealand-in mak taka Pakistan an hneh lohna hmun kha a ni bawk. Black Caps hian 401 runs tehmeuh an siam thei a, chakpui ngei turin tam tawkah ngaih theih mah se ruahsurin Shaheens a chhan a, 25.3 over lekah 200 runs an siam. DLS method hmangin Pakistan hi 21 runs-in an chak.

Hriat tel tur chu England leh Sri Lanka inkhelh ṭum khan Three Lions-in 156 runs chauh an siam a, an thi vek. Chutihrualin England hian 156 runs siam tur hian over 33.2 chauh an hmang tih hriat a ṭha a, a chak zawk Sri Lanka-in over 25.4 lekah 160/2 runs siamin an chak.

Vawiin inkhelah pawh hian run a sur leh a rinawm a, beisei tur nei tawh lo Lions ai chuan chak ngei mamawh New Zealand hi an thawm a ring zawk turah a ngaih theih. Kane Williamson-a hote hi an chak a nih chuan semifinal-a kum 2019 World Cup semifinal-a an khingpui India bawk an hmachhawn dawn. Inelna thlengtu hian Black Caps laka phuba lak aiin ṭhenawm ram Pakistan emaw Afghanistan emaw an tum châk a rinawm zawk.