Zahna chibai buk tlak Glenn Maxwell

Cricket World Cup-ah Australia an danglam ṭhin a, kuminah erawh team satliah ang maiin bul an ṭan. Aussies-in match hnih chak loin bul an ṭan a, mahse an zia chhuahin match nga an chak zawn. November 7, Thawhlehniah Afghanistan an hmachhawn a, an chak chuan tling mai tur a ni.

Mahse, beisei ang ngawtin thil a thleng lo. Wankhede Stadium, Mumbai-ah Afghanistan-in 291/5 runs an siam a, 100 runs an siam tlin hmain batter pasarih an thi tawh. World Cup-a vawi nga champion tawh Australia-in chhantu an mamawh a, hun harsaa rawn pen chhuak chu Glenn Maxwell a ni.

Maxwell hi a tawp thlengin a ding a, 128 ball-ah 201 runs siamin Australia a chakpui. Captain Pat Cummins pawhin a hna a tlin a, Maxwell-a'n kawppui a mamawh tih hriain thi loin a din pui char char. Cummins-a khelh dan hi chu runs aṭanga teh chi a ni ve lo a, ball 68 zet a hmachhawn chunga inkhelh zawh hmaa pavillion-a kir lo hi a ropui hle.

Afghanistan hian Ibrahim Zadran century siam hmangin beiseina sang tak an nei a, target pangngai tak an chhawp bakah a vawm lamah an che ṭha bawk. Azmatullah Omarzai-a'n opener David Warner (18) leh Josh Inglis (0) te a zawn zatin a vawm hlum a, hattrick siam thei dinhmunah a ding. Hetah tak hian Glenn Maxwell a rawn lut a, Australia hian 49/4 runs chauh an la siam avangin an dinhmun a chhe takzet.

Captain Pat Cummins rawn luh chuan 91/7 a ni hial a, Afghanistan hi chak ngei tura ngaih an ni tawh. Maxwell hian Netherlands an hneh ṭumin World Cup century siam rang ber record siam mah se Afghanistan lakah a erawh a hnung hliam leh tha chat vangin harsatna lian tak a tawk.

Australian batter Maxwell hi a huai bakah a vannei tel a, 24 runs leh 33 runs a siam laiin Afghan player-ten ball an thlauh. A hnu lama Maxwell-a chet dan chu mumang ang mai a ni. Inkhelh banah Maxwell chuan, "Khelmual ka luh khan a boruak a lum em em a, ni sa hnuaia training ka neih tlem avangin a harsa. A tawp thlenga ka dam erawh ka vannei tel a, captain Patty-a'n min thlawp ṭha bawk," tiin a sawi.

Australia captain Pat Cummins pawhin Maxwell hi a fak a, a chet dan chu thua sawifiah chi a nih loh thu a sawi. Afghanistan captain Hashmatullah Shahidi erawhin pawi a tih thu a sawi thung a, Maxwell a fak rualin wicket lak theihna hun ṭha an hman ṭangkai loh, an tawrh thu a sawi bawk.