Zu kan khap tlat dawn - Chief Minister

MNF party chuan nimin khan an pisa Mizo Hnam Run chu kum 2020 atan an hawng a; hawnna inkhawma thu sawitu MNF president Zoramthanga, chief minister chuan, sorkarin zu an khap tlat tur thu a sawi.

Mizo Hnam Run hawnna inkhawm hi MNF treasurer K Vanlalauva'n a kaihruai a; Chief Minister chuan, zu khap ṭha an tih avangin zu khapna dan an siam tih sawiin, "Zu kan khap tlat dawn. A zuar chi chuan kan kal dawn lo hrim hrim. Zu khapna dan hi a ṭul angin kohhran leh mi dang dangte nen inráwn tawnin a ṭul ang zela kalpui a ni ang," a ti.

Zoramthanga chuan, zu khapna dan duan mekah rawtna hrang hrang a awm tih sawiin, "Dan hmasa lama lo awm tawh, zupui leh zufáng ang chite kût nía entira pholante a ṭha em, tihte rawtna a awm. Inrâwn tawnna kalpui mek a nih laiin zu zuar leh tur ang lek leka sawina a awm," a ti a; Mizoram Liquor Prohibition (MLP) Rules tur chu Cabinet-in a ngaihtuah tur thu a sawi.

Hetih lai hian, Mizoram sorkar chuan The Mizoram Liqour (Prohibition) Rules, 2019 chu December 19, 2019 khan notification hmangin a tichhuak tawh a ni.

MNF President chuan, Cong­ress ralna tur hun a inṭan nia sawiin, "Delhi lamah Congress kan hmu. MNF-ah mi zawng zawng luh khawm i tum tawh ang u. MNF parvul hun, Zoram parvul hun leh Mizo parvul hun a thleng dawn," a ti.

India hmarchhaka remna leh muanna a awm theih nana hman­ruaah India sorkarin Mizoram leh a Chief Minister a mamawh nia sawiin Zoramthanga chuan, "Hmalak mek a ni a, hmachhawp pawh ṭhahnem tak a awm," a ti a; MNF tawnhriatte chu sorkar laipuiin a hman ṭangkaina tur a hriat telh telh thu a sawi.

Chief Minister chuan, kum tharah beiseina sang tak a neih thu sawiin, "Ka thinlungah ka lawm. Kum thar lo awm turah hian hrui kan pawh a, kan pawt chhuak ṭeuh ang hian, kuminah a hmáwr kan pawt chhuak dawn a ni," a ti.

Lok Sabha MP C Lalrosanga pawhin thu sawiin, a tawn ngai loh thil tam tak a tawn thu a sawi a, "Lalpa awmpuina leh thlamuanna kan chhungkuain kan dawng a, vawiin thlengin zâm loin, thinlung dam takin kan awm thei. Diriamna leh tihhmingchhiat min tumnaah rilru ná an awm tih ka hria a, a pawi ka ti," a ti a; beihna a tawh vanga rilru náte chu Pathianin a tihdam tawh a beisei thu a sawi.

C Lalrosanga chuan, an zâm loh thu sawiin, "Kan dikna, thiamna leh felnate Lalpa'n a hun takah a tarlang zel dawn. Hnehna chu Lalpa ta a nih avangin," a ti.

Inkhawmah hian MNF Presi­dent chuan Congress party general secretary hlui leh Congress party aṭanga MLA candidate pawh lo ni tawh Prof. LH Chhuanawma chu MNF party-ah a lawm lut a ni.



Share this Post

Login to comment
No Comments