Sorkarna kan siam theih ngei ka ring - ZPM President

ZPM president Lalliansawta chuan, Mizoram Legislative Assembly inthlanpuiah sorkarna siam tura an chak ngei a rin thu a sawi.

Lalliansawta hian nimina vote a thlak zawhah Vanglaini palai zawhna chhángin, "Sorkarna kan siam theih ngei ka ring. Mipui rilruah hian kan auhlate a tla náin ka hria. Kalphung thar, mipui sorkar hi mipuiin kan thlahlel tawh a ni. Party sorkar kan hrawn reng a, tunah chuan mipui sorkar kan nghakhlel a ni," a ti.

Ṭum dang aiin kuminah inthlan boruak a sanga a hriat thu sawiin Lalliansawta chuan, "Mipuiin kan tuipui vang a ni a, vote tla percentage hi kum dang aiin a sàn ka beisei," a ti a; mipui sorkar siam turin mipui an phûr hle nia a hriat thu a sawi.

ZPM President chuan, "Kalphung thar, mipui sorkar hian mi rilru a su nghîng nasa a, mipui hian party sorkar ni lo, mi zawng zawng huap sorkar an beisei niin ka hria. Keimahni ṭhat vang ni loin kalphung thar boruak hian min chhém a, sorkarna siam turin kan beisei sang viau a ni," a ti.

Lalliansawta chuan, hmun hrang hranga ZPM vote-tu mipui chungah lawmthu a sawi a; mipuiin an beisei ang ngeia an vote rah an seng ngei a beisei thu a sawi bawk.

ZPM chief ministerial candidate Lalduhoma chuan thuthar thehdarhtute zawhna chhangin, state pum huapin ZPM dinhmun a ṭha a, party mala sorkarna an siam ngei a beisei thu a sawi.

Lalduhoma chuan, Serchhip biala polling booth hrang hrang a tlawhnaah mipui thlàwpna ṭha tak an hmu nia a inhriat thu a sawi a; a dinna Serchhip bialah kum 2018 inthlanpui leh kumina inthlanah danglamna tam tak a awm tih sawiin, kum 2018-a chakna aiin kumina a chakna a san zawk theihna a awm thu a sawi bawk.