Seat 26 kan lâk ka ring - Lalsawta

Mizoram Pradesh Congress Committee (MPCC) president Lalsawta chuan, Mizoram inthlanpuiah Congress party an chak ngei a rin thu leh a tlem berah bial 26 an lâk a rin thu a sawi.

Lalsawta hian nimin zing dar 7 khan Mission Vengthlang polling station-ah vote a thlâk a, vote a thlâk zawha Vanglaini palai zawhna chhángin, inthlanna nuam tak leh hahdam tak harsatna awm loa neih a ni chu lawmawm a tih thu leh kumina MLA inthlanpuiah hian Congress party an chak ngei a rin thu leh sorkarna siam ngei an inbeisei thu a sawi a ni.

Congress party President chuan, inthlanpuiah mipui an phûr hlea a hriat thu a sawi a, "Phai lama mite chuan Congress party-in seat 24 kan lak an rin thu an sawi a, mahse, keini chuan a lo berah seat 26 kan lak kan ring," a ti.

Lalsawta chuan, inthlan hmasaahte an lo tih ṭhin tawh angin Mizoram People Forum (MPF)-in thâ an thawh nasat thu sawiin, an chungah lawmthu a sawi a, "Polling officer-te leh thawktu zawng zawngte an hah a, an thawhrimnaah ka lawm tak zet. Party tin worker-te pawh kan phûr tlang a, a lawmawm hle a ni," a ti.

MPCC President chuan, Congress party candidate-te vote-tu zawng zawng, an party mite leh party mi ni lote chungah a lawm thu a sawi bawk.