Keimahniin sorkarna siam theih ngei kan inbeisei - Zoramthanga

MNF president Zoramthanga chuan, MNF party-in a mala sorkarna an siam theih ngei a beisei thu a sawi.

Zoramthanga hian nimin zing khan Ramhlun Venglai polling station-a vote a thlak zawhah thuthar thehdarhtute zawhna chhángin, Pathian leh mipuite zarah tlin zawh ngei an inrin thu a sawi a, "Keimahniin sorkar siam theih ngei kan inbeisei," a ti.

MNF President chuan, Covid-19 léng kárah nasa taka hna an thawh thu sawiin, "Kan hmabak chhunzawm nan min thlan tlin ngei kan ring. Chu bakah, Myanmar, Bangladesh leh Manipur buainaah hian MNF sorkar hi a ṭul a ni tih a mipuiin an hria a ni," a ti a, chu'ngte avang chuan MNF an tlin ngei a beisei thu a sawi.

A bial Aizawl East-I bik a hmuh dan zawhna chhangin Zoramthanga chuan, "A lian deuh hlek party dang aṭanga lo kal tura ka ngaih laiin, a lian lutuk lo an han dah thliah thliah a, chuvangin, kan tlin ngei ka ring a, tlin ka huphurh lo," a ti.

Zoramthanga chuan, Zo hnahthlakte Mizoram sorkarin a lo chhawmdawl dan chu an tlin theih chhan tura pawimawh a nih leh nih loh zawhna chhángin, "Tunah chuan hnam thinlung pu MNF-te'n sorkar kan siam laia kan chhehvela kan unaute'n thlamuanna leh chakna leh himna an hmuh hi a takin kan hmu a, hei hi ka ring pawh ni loin a takin a lang tawh," a ti a, Mizorama MNF a sorkar chu Zo hnahthlakte himna leh chakna atan a pawimawh thu a sawi a ni.