KHAWTHLIR

Inkhuaikhem thubuai 83 ziak lut

Kumin thla kua, January-September chhungin Mizoramah naupang kumtlinglo pawngsual leh khuaikhem thubuai 83 ziah luh a ni. Mizoram Police chhinchhuah danin, Prevention of Children from Sexual Offences (POCSO) Act, 2012 hmanga thubuai ziahluh 83 zinga 24 chu naupang kumtlinglo chhungkhatte pawikhawihtua puhna a ni. Kum 2018 aṭanga September 30, 2023 chhungin POCSO Act hnuaiah Mizoramah thubuai 608 ziah luh a ni.

AR-in heroin man

Assam Rifles sipaite chuan November 6, Thawhṭanni khan Zokhawthar leiah heroin gram 78.5 an man a, Champhaia Excise & Narcotics department hnenah an hlân chhâwng. Heroin an man hi international market-ah Rs 54,95,000 hù a ni.

Sûnna tichhuak

Chief Electoral Officer office chuan kumin Mizoram inthlanpuia duty police pahnih thi ta Z Lalmuanzuala leh Lalfakawma te sûnna thuchhuah a tichhuak. Z Lalmuanzuala leh Lalfakawma te chu uiawm an tih thu tarlangin, "Election department chuan ram tana an inpeknate chhuanawm a ti a, an kalsan an chhungte thinlung takin a tawrhpui a, Pathianin a awmpuia a venhim zel theih nan duhsakna a hlan a ni," an ti. Z Lalmuanzuala hi November 5 khan an duty-na tur Jarulsury an pannaah lirthei chesualah a thi a, Lalfakawma chu November 5 vek khan Champhai District Hospital-ah a thi a ni.

Vote thlaktu upa

Nimina Mizoram inthlanpuiah kum 115 mi Fahmiangi, Pangkhua, Lawngtlai district chuan vote a thlâk a, hriat theih chinah vote thlaktu zinga upa ber a ni a, a thlalak phek 2-naah dah a ni. Inthlanah hian kum 80 chung lam tan mahni ina vote thlak theih ni mah se, kum 100 tling tawh zingah pawh polling station-a vote thlâk an awm nual a ni.