Police-in boruak a muanawmah an ngai

Nimina Mizoram MLA inthlanpui vote thlak zawh tâkah dan leh thupek kenkawh kawngah harsatna a awm lo a, boruak muanawm tak hnuaiah inthlan kalpui a nih thu police hotute'n an sawi.

Vanglaini palai zawhna chhangin IGP (Hqrs.) Lalbiakthanga Khiangte chuan, dan leh thupek kenkawh kawngah harsatna a awm lohna turin theihtawp an chhuah thu a sawi a, "Hmun hrang hrang aṭangin report kan dawng reng a, boruak a ṭha a, dan leh thupek kenkawh kawngah harsatna pakhat mah a awm lo," a ti.

Lalbiakthanga Khiangte sawi danin, dan leh thupek chungchanga buaina a awm leh awm loh Ministry of Home Affairs pawhin an rawn ngaihven reng a, darkar tin report an thawn ṭhin.

Mizoram Police tarlan danin, him taka vote thlak a nih theih nan venhimna lamah ruahmanna an siam a, duty turin civil police aṭangin mi 1,831, state armed police aṭangin mi 2,527, central armed police force aṭangin mi 2,700, Mizoram Home Guard aṭangin mi 160 ruat an ni a, an zavaiin mi 7,218 an ni.

Force-te hi polling station duty, sector police officer, nakas (checkpoint), inter-state border check post, static surveillance team, flying squad, EVM guard, observer security, candidate security, CAPF/SAPF liaison officer, quick response team, district striking force, control room operation, area domination, district election cell, PHQ Election Cell, reserve force, vehicle security, dispatch centre security, receive centre security, zonal officer-te bakah ramri venhim leh ṭul dang atan hman an ni.