Mizoram inthlan tluang taka neih a ni: Zan dar 8 thlengin vote thlâk an la awm

Mizoram State Legislative Assembly General Election vawi kuana chu nimin khan tluang takin neih a ni a, buaina leh harsatna lian tham sawi tur a awm lo. Nimin tlai dar 4 thleng khan vote 76.53% a tla. Vote tlate chu December 3, 2023-ah chhiar tura inbuatsaih a ni.

Mizoram MLA inthlanpuiah hian electronic voting machine (EVM) a ṭhat leh ṭhat loh enfiahna atan vote thlak chhin (mock poll) a nih hnuah zing dar 7-ah polling station tinah vote thlâk hun hawn a ni a, a tlangpuiin tluang takin vote thlâk a ni.

Inthlan hi Assembly constituency 40-a polling station 1,276-ah kalpui a ni a, kum 2018 inthlanpui aiin 112-in a tam. Polling station 1,276 zinga 30 chu vil uluk bik ngai, critical polling station a ni. Polling station zinga voter tamna ber Zemabawk VIII-ah mi 1,481 an awm a, voter tlemna ber Thehlepah mi 26 an awm.

Vote thlâk hun hi tlai dar 4 thleng tura ruahman ni mah se, Aizawlah chuan tlai dar 4-a vote thlak zawh hman lohna polling station eng emaw zat a awm a, tlai dar 4-a polling area-a awm hman tawhte chu tlai dar 4 hnuah pawh vote thlâktir an ni.

Voter tamna polling station, a bikin Aizawl veng hrang hranga polling station-ahte chuan niléngin chatlak awm loin vote thlâk a ni a, voter tlêm deuhna polling station-ahte erawh vote thlâk a hàn deuh lai a awm ṭhin thung.

Nimin tlai dar 4 thlengin Mizoram pumah vote 76.53% a tla tawh a, nizan dar 8 vela CEO pisa aṭanga press note tihchhuah chuan polling station ṭhenkhatah vote la thlak mek zel a nih thu a tarlang.

Inthlan hi boruak rálmuang tak hnuaia neih niin, boruak duhawm lo thleng a awm lo a; inthlan hi a buaipuitu official-te bakah Mizoram Peoples Forum (MPF) dinna district-ah chuan MPF local forum-te'n inthlan an buaipui a, MPF headquarters, constituency forum leh district forum hruaitute'n an vil a ni. Polling station ṭhenkhatah a ṭul apiang ti turin volunteer (sikul naupang) eng emaw zat an awm bawk.

District tinah Election Commission of India (ECI) duh dan ang leh thuneitute ruahman angin polling station 1,276 zinga a zatve aia tam 53.25%-ah webcasting tih a ni a, polling station-a chêt vel dan chu live video-a pek chhuah niin, thuneitute'n district electrion officer pisa aṭangin an lo vil a ni.

District hrang hranga district election officer (DEO) te, observer te, sector officer-te leh flying squad-te chuan an huam chhunga polling station hrang hrang an fang kual bawk.

Inthlana vote tlate chu ECI ruahman dan chuan December 3, 2023-ah chhiar tur a ni a, Aizawl district-a vote tlate chu hmun pathum - Aizawl College, Assembly Annexe leh Aizawl DC Complex-ahte chhiar a ni ang. Hetih lai hian, Mizorama pawl hrang hrangte leh political party hrang hrangte chuan vote chhiar ni tura ruat hi Pathianni a nih avangin sawn turin ECI an ngen mek a ni.

Polling party-te chuan nizan khan an awmna district headquarters ṭheuh an pan nghal a, EVM-te chu political party hrang hrang aiawhte enpuina hnuaiah strong room-ah dah luh nghal niin, kalh nghal a nih bakah, a chàrna bika siam hmangin chàr nghal a ni a, sipaiin chhun zan zawmin an véng zui dawn a ni.