Assam Rifles chuan Mizo zirlai 14 leh zirtirtu pahnih tan National Interactive Tour an buatsaih a, tour-a kal turte chu nimin khan Home minister Lalchamliana’n Aizawla 46 Assam Rifles hmunpui aṭangin a vailiam.

Minister Lalcham­liana chuan, Assam Rifles-in zirlaite hmakhua ngaia National Interactive Tour an buatsaih chuan zirlaite leh Mizo thalaite a chawh phûr a beisei thu sawiin, "Zirlaite'n India ram ropui tak chanchin leh hmasawnna hnathawh hrang hrang an belh chian a, an hma lam hun leh an nun kawngah a ṭha zawnga nghawng a neih ngei ka beisei," a ti a; tour-a kalte chu Mizoram leh Mizo aiawh an ni tih inhria a, nungchang mawi lan chhuahtir tur leh hlâwkna chhar ngei tum turin a fuih.

National Interactive Tour hi December 2-14, 2019 chhung neih tur a ni a, tel turin Mizoram hmun kilkhawr zawk aṭangin zirlaite thlan an ni. Tour-a kalte chuan Delhi, Dehradun leh Mu­ssorie-te an tlawh dawn a, Indian Military Academy, Dehradun-a sipai officer training zote passing out parade pawh an chhim dawn a ni. 

Share this Post