Excise & Narcotics department (END) chuan Mizoram Liqour Prohibition Act, 2019 (MLP Act) khauh zawka kenkawhna lamah ṭan an la a, tunlai hian Aizawl kawtchhuah hmun hrang hrangah leh station hrang hrangah lirthei khalhtute zu leh ruihhlo laka an fihlim leh fihlim loh an endik ṭhin.

Excise enforcement hian Aizawl kawtchhuah hrang hrangah lirthei khalhtute an endik a, hna an thawh (motor an khalh) laiin zu an in leh in loh breath analyzer hmangin an endik ṭhin a ni.

END hotute chuan, Aizawl kawtchhuah hmun hrang hranga lirtheih khalhtu, a bikin khualzin phur lirthei kalhtute zu leh ruihhlo laka an fihlim leh fihlim loh an endiknaah, a tlangpui thuin driver-te an fihlim tih an sawi a; chutih rualin, zu leh ruihhlo lakah Mizoram a him zel theihna turin Mizo mipuite puihna leh ṭawiawmna an beisei reng tih an sawi bawk.

END chuan, Krismas leh kumthar lo thleng tura inpuahchahna atan khualzin veivâk an ṭhahnem ṭan tih sawiin, state páwn lam leh hmun dang aṭangin dan loa zu leh ruihhlo lut a awm ve reng bawk tih an tarlang a, "Excise & Narcotics department chuan he kan hun pui lo thleng turah hian mumal taka hmalak dan tur ruahmanna - Standard Operating Procedure (SOP) a duang a, SOP angin station hrang hrangah hmalak mek a ni," an ti.

Share this Post