Naupangte'n hri danna an dawn kim theihna tura sorkar laipuiin Intensified Mission Indradhanush (IMI) 2.0 a duan chu nimin aṭang khan Lunglei district leh Champhai district-ah ṭan a ni a, naupangte hnenah hri danna damdawi pek a ni.

Lungleia IMI 2.0 hawnna inkhawm hi Chief Medical Officer pisa tualah neih a ni a, Lunglei CMO Dr Thani Pachuau-in kaihruaiin, district bawrhsap K Lalrinzuali'n a hmanpui.

K Lalrinzuali chuan, IMI 2.0 chu Mizorama district pangaah kalpui a nih tur thu sawiin, Lunglei district pawh hmalakna tur a tam avangin hmalakna tur zinga mi a nih thu a sawi a, "Khaw chengker leh kal pawh harsa tak tak a tam bakah, pém chhuak leh lut an tam avangin naupangte hnena hri danna pek hi hna khirh tak a ni a, thawktute'n ṭhahnemngai taka an beih a ṭul dawn a ni," a ti.

Lungleia senior MO Dr Lalrinthangi chuan, India ramah naupang hri danna chi 11 pek mek a nih thu sawiin, chu'ng zinga chi 10 chu Mizoramah pek a nih thu a sawi a; Lunglei khawthlang lam tlangdungte kalpawh harsa leh insawn kual reng an nih avangin an target 90% chu tlin a harsat thu te, IMI 2.0 hnuaiah hian khaw 34-ah hmalak a nih dawn thu te, khaw 34-ah hian naupang kum 2 chin mi 188 leh nau pai mi 45 hnenah thla li chhungin vaccine pek tur a nih thute a sawi bawk.

Champhai District Task Force for Immunization (DTFI) pawhin IMI 2.0 kalpui tur chu nimin khan Tlangsam Health Sub-Centre-ah Champhai IPRO Dr Lallawmkima'n a hawng. Hmalakna hian Khawzawl leh Saitual district pian hmaa Champhai district-a awm zawng zawng a huam dawn.

Hawnna inkhawma Dr Samuel Laldinthara sawi danin, IMI 2.0 hi thawh (round) lia kalpui tum a ni a, kumin December 2 bakah, nakkum January 6, February 3 leh March 2-ahte neih tum niin, round tin chu ni sarih (chawlhkar khat) awh tur a ni. Champhai district-ah IMI 2.0 hmanga vaccine pek tur zat chu naupang kum 2 hnuai lam 68 leh nu naupai pahnih an ni a; naupangte chu Champhai Main Centre hnuaia mi vek niin, nau pai mi pahnihte chu Rabung Sub-Centre hnuaia mite an ni.

IMI 2.0 hi Mizoramah chuan district panga - Champhai, Kolasib, Lawngtlai, Lunglei leh Mamit district-ahte kalpui a ni a; naupang kum 2 hnuai lamte leh nu nau paite hnenah oral polio vaccine, pentavalent vaccine, fractional inactive polio vaccine, bacillus calmette guerin vaccine,  measles rubella vaccine leh rota virus vaccine-te pek niin, nu nau paite tan tetanus and diptheria vaccine pek a ni thung. 

Share this Post