Vawiinah Sangma vui dawn

Kar kalta Zirtawpni-a boral Meghalaya chief minister leh Lok Sabha speaker pawh lo ni tawh Purno Agitok Sangma chu vawiin hian state chawimawina nen Tura-ah vuiliam a ni dawn.

Sangma hi Ram Manohar Lohia Hospital, Delhi-ah lungphuchawl avangin a boral, Indian Air Force aircraft chuan Guwahati a thlenpui hnuah a ruang hi helicopter hmangin Guwahati aṭangin an khua, Tura-ah kar kalt Inrini khan thlenpui a ni tawh. A ruang thlen lai hian mipui tam takin an lo hmuaka, vawin hian state sorkar chuan a vui liam dawn ta a ni.

Union minister of state Kiren Rijiju, Union minister for Development of North Eastern Region Jitendra Singh leh Union Water Resources Minister hlui Vincent Pala ten Delhi aṭangin Sangma ruang hi an zui a ni. Mi tam takin Lok Sabha Speaker hlui Purno Agitok Sangma chu an ui thu sawiin, zahna an lantir bawk.

Meghalaya Governor V. Shanmu-ganathan chuan Sangma a ui thu sawiin, politician ṭha tak leh hruaitu ropui tak a nih thu te, Hmarchhak state aṭanga politician ropui leh India hruaitu lawk te pawhin an hriat a nih thu a sawi. Governor chuan a chhungte leh ram mipuite chu Sangma thiltih ṭhat tam tak te chu chhunzawm zel turin a ngen a ni.

Union Minister of State Jitendra Singh pawhin Sangma a ui thu uar taka sawiin, Sangma chu ropui bik, mi zawng zawng entawn tlak a nih thu leh, a bikin parliament member-te tan chuan 'role model' a nih thu leh parliament chhunga a khawsak ṭhin dan chuan midangte rilru a hneh thu a sawi.

Singh chuan DoNER minister a nih hnuah vawi tam tak a hnen aṭanga thurawn a lak thu sawiin, hmarchhak hmasawnna tur hian a thawhhlawk tak zet a ni, a ti bawk. Union Minister of State for Home Affairs, Kiren Rijiju pawhin a chungchhang sawiin, "Purno Agitok Sangma chu politician danglam leh ropui bik a ni, hmarchhak mai nilo India tan chhanna nasa tak a ni" a ti. "A hnen atang hian zirtur tam tak kan nei a, hmarchhak-in hma a sawn zel theih nana a hna thawh te hi a ropui tak zet a, a hnathawh zawh loh tam tak hi kan chhunzawm tur a ni" Rijiju chuan a ti.