India leh Myanmar sorkar aiawhte'n Insumdawn tawnna hmun an enfiah

India leh Myanmar inrìna Zorinpui, Lawngtlai district-a Indo-Myanmar insumdawn tawnna tur Land Custom Station sakna tur hmunhmate November 30, Inrinni khan India leh Myanmar sorkar aiawhte leh Mizoram sorkara Commerce & Industries department hotute'n an tlawh a, hmalak dan tur an en.

Zorinpui tlawhnaah hian Myanmar aṭangin sorkar aiawh mi 10 an tel a, India sorkar aiawhin mi pasarih leh Mizoram Commerce & Industries department aiawh mi pali an tel thung a; Assam Rifles hotu Brig. Vinod S hoin ramria insumdawn tawnna hmunhma an enfiah a ni.

Zorinpui hmuna Land Custom Station dinna atan Commerce & Industries department chuan ram bigha 67.32-a zau an lei a, hmunhma cheibàwlna leh in hrang hrang sakna atan cheng vbc. 57.99 hû detailed project report (DPR) an thehluh chu pawm a ni tawh. Schedule of Rate (SoR) 2019 milin revised DPR thehlut leh tura ruahman a ni bawk.

Ram pahnih aiawhte'n Inrinnia ramri an enfiahnaah hian Zorinpui leh Myanmar rama Myeik-Wa khaw inkara lei dawhna hmun tur hmun an en nghal bawk.

Sorkar thuchhuah chuan, India leh Myanmar insumdawn tawnna atana Kaladan Multi-Modal Transit Transport Project (KMMTTP) kawngpui sial hna Mizoram PWD hnuaia thawh mek chu 85% thawh zawh tawh a ni tih a tarlang a ni. 



Share this Post

Login to comment
No Comments