ZPM secretary general K Sapdanga chuan, Citizenship Amendment Bill (CAB) chungchanga Mizorama political party-te leh tlawmngai pawlte inlungrualna ber chu khauh taka dodal a nih thu a sawi.

K Sapdanga hian nimin khan an party pisaah thu sawiin, tun hnaia Union Home minister Amit Shah chu Mizorama political party leh tlawmngai pawlte'n an hmuh chungchang a sawi a, "Kan thu thlen turte kan sawiho a, rawtna chi hrang hrang kan nei. Kan inlungrual tlânna ber chu khauh taka dodal a ni. Union Home Minister-in kan duhzáwngte duh tâwka sawina hun min pe a, thu thuhmun deuh kan sawi deuh ṭheuh a ni," a ti.

CAB chu India ram puma hman ngei a nih tur thu Amit Shah-a'n a sawi chiang tih sawiin Sapdanga chuan, "Sorkar laipuiin hmarchhak a duhsak thute sawiin, CAB chu dodal loa thláwp turin min ngen. Kan rilru hminna atan a ti nge, Bru chungchanga an hmalak dan turte a lo sawi a ni," a ti a; CAB an thlàwp loh thu thlen tura kal an nih thu Amit Shah chu an hrilh tih a sawi.

Thu sawitu dang Kola­sib ZPM adviser Lalfamkima chuan, hun rei tak Congress leh MNF-in ro an inrêl chhâwk ṭhin hnuah ZPM a pian thu sawiin, "MLA inthlanah Mizoram politics bung thar siam tham kan tling ta. Heng party hlun pahnihte hian min ngaimawh rawn ta hle. MNF hian opposition party emaw intiin, keini hi ruling party emaw min ti ni maiin a lang, phuahchawp pawhin min sawisel ngar ngar a ni," a ti.

Lalfamkima chuan, Congress chuan mi sawi hnâwm dan an thiam hle tih sawiin, "Min fak a, Congress leh ZPM-te inthlan apianga thawkho tur angin an mite hnenah an sawi a ni. MLA inthlan leh huna thawkho a, sorkar siamho tur anga sawiin, an mite rawn insawn tum thlêm nan an hmang a ni," a ti a, ZPM nena thawkho tur anga insawi chu mipui hnena ZPM sawi­chhiatna ṭha berah Congress chuan an ngaih thu a sawi.

ZPM thuchhuah chuan, tun hnaia Vangpui Fehchhuah an neih kal zelah Tuikum constituency-a MPC block chu an president Rualthankhuma hoin ZPM-ah an inchhûng lut tih an tarlang.

Share this Post