Mizoram sorkarin hnam issue pawimawh a ngai pawimawh tâwk lo - Prof. JV Hluna

Mizoram BJP president Prof. JV Hluna chuan, Mizoram sorkar chu hnam thil ngai pawimawh tâwk loah a puh a, "Union Home Minister nena Citizenship Amendment Bill (CAB) sawihonaah hmarchhak state dang chu an chief minister hoin an kal a ni," a ti a; Mizoram sorkarin Forest minister chawpchilh taka an tir chu a dem.

Prof. JV Hluna hian nimin khan an pisaah thuthar thehdarhtute kâwmin, Union Home Minister hoa November 29, 2019 zana meeting neiha tel turte chu a hming mala sawm an nih thu a sawi a, "A hming mala sàwm zingah chuan Chief Minister leh Home Minister-te pawh an tel. Forest Minister chuan conference danga a kal tur Guwahati a thlen tawh hnuah an puten CAB sawihonaa kal tura an tih chawp thu min hrilh," a ti a; Mizoram sorkar hotute'n Forest Minister chu Union Home Minister hoa CAB sawihonaa sawi tur chah an neih loh thu a sawi.

Amit Shah chuan, 'Aizawl ka lo kal khan CAB chungchangah Mizoram himna tur suggestion siam ula, Parliament-a pass hmain sawihona hun kan buatsaih leh dawn nia ka ti a, eng nge rawtna in neih le?' tia a lo zawh thu sawiin JV Hluna chuan, "Mizoram sorkarin CAB chungchanga Mizoram ngaihdan thlen turin sawihona a buatsaih âwm ka hre lo. State dangte chuan an sawiho hnuah ziakin an state ngaihdan leh duh dante an keng a, chu'ngte chu Union Home Minister an sawipui a ni," a ti.

Mizoram BJP President chuan, Congress aṭang pawhin an hruaitu liante'n CAB sawiho turin hun an pe thei lo tih sawiin, "Hetiang hnam issue sawi hun­ah hian political party hotu lian kal duh tlat lo, ngaihsak lo kan awm leh tlat ṭhin a, a pawi khawp mai. Party indaidanna hi ṭhiat a, Mizoram tan a ṭha turah chuan lungrual taka thawkho turin kan insáwm a ni," a ti a; Mizoram chu political party-te'n an hmangaih tak tak lo nia a lan hial thu a sawi.

Assam Rifles leh BSF-te'n mi an hriat hran loh avangin ram dang mi Mizorama an luh ṭhin thu an sawi ṭhin tih meeting-ah sawi chhuah a nih thu sawiin JV Hluna chuan, "Ramri veng tur hian BSF leh CRPF Mizo battalion din ni se ṭha takin an veng thei ang, ka ti a ni," a ti. 

Union Home Minister-in Mizo battalion tih chu a rem lo a, amaherawhchu, Mizo hlang awmna CRPF leh BSF battalion pakhat ve ve chu an din theih tur thu a sawi tih sawiin, chu thil chu bawhzui turin Mizoram sorkar an phût tih a sawi bawk.



Share this Post

Login to comment
No Comments