Thlen chin aṭanga hmasawn kan ngai - Allegri

Juventus coach Massimiliano Allegri chuan a naute chuan season ṭha takin hmang mek mah se nomawi chawi tur chuan tun aia hmasawn an la mamawh thu a sawi.

Juve hian Coppa Italia final lut turin Inter Milan chu penalty shootout-ah an hneh hram a, first leg-a goal thum an khung sa an sut zawh tir a ni. Serie A champion lai Juve hian Pathianni zan dar 7:30 hian Atalanta khelmual an pan dawn a, an title humhim turin goal venhim lamah insiam ṭhat an mamawh ang.

Italian manager Allegri chuan, "Tun hnaiah inkhel hautak tak tak kan hmachhawn zawn avangin player-te an chau tawh a, kan thlen chin hi ṭha thawkhat hle mah se nomawi chawi thei tur chuan kan rilru kan tih paukhauh zual a ṭul. Napoli hian na takin min nawr reng a, kan chetsual vaih chuan min min kalsan thei dawn. Chuvangin inkhel zawng zawng hi final ang maia pawimawh a ni vek tawh," tiin a sawi.

Tun dinhmunah Juve hian league match 27 khelh tawh
aṭanga point 61 hmuin hmahruaitu ni mah se pahnihna Napoli nen an inthlauhna chu point thum chauh a ni a, vawi khat chetsualah in lehthal thei an la nih avangin team pahnih tan khelh ṭhat ngaih vanglai a ni.

Chak mamawh

Napoli hian zanin dar 1:15 hian Chievo an lo mikhual dawn a, hnehna an chang thei a nih chuan Juve an nih rual dawn a, Pathianni zana inkhel tur Turin club tan pressure na tak an siamsak thei ang.

Napoli hian tun hnaiah inelna hrang hrangah match nga chhung chu chak ni hmel an hmu tawh lo a, league-ah bik Inter leh Fiorentina te inhnehtawk puiin kum 1990 hnua a vawi khat nana league title chawi an beiseina chu Juve lakah an hloh lek lek tawh a, beisei erawh an la nei.