Vanglaini - Meth mûm 3,03,000 man

KHAWTHLIR

Youth Conclave-ah tel

Inrinni khan Guwahati-ah Youth Conclave 2019 buatsaih a ni a, Mizoram aṭangin Lok Sabha MP C Lalrosanga leh MFA honorary secretary Lalnghinglova Hmar te telin, thupui thlan bik hmangin thu an sawi. Youth Conclave-ah hian hmarchhak state aṭangin kawng hrang hranga mi hlawhtlingte an tel a, kawng hrang hranga hmarchhak hmasawn dan tur an sawiho a ni.

Thisen pe

November 30, Inrinni khan Champhai Vengsang Pastor Bial KṬP-te'n Champhai District Hospital tan thisen unit 34 an pe a, petute mipa 28 leh hmeichhia paruk an ni. Luangmual West Branch KṬP-te'n an kohhran hall-ah blood donation camp huaihawtin, Synod Hospital tan mipa 19 leh hmeichhia pahnihte'n thisen unit 21 an pe a; Serchhip Hmarveng Branch KṬP pawhin Serchhip District Hospital tan thisen unit 20 pein, petute mipa 13 leh hmeichhia pasarih an ni.

Anganwadi tlawh

Social Welfare minister Dr K Beichhua chuan November 29, Zirtawpni khan Siaha district-a Phúra, Vahia, Khopai leh Siatlai khuaa anganwadi centre-te a tlawh a; anganwadi chu a nihna tur ang taka kalpui a nih chuan naupangte hriselna leh an ṭhan lenna atan thil ṭha a nih thu sawiin, khawtlang hruaitute leh anganwadi worker-te chu anganwadi hmasawnna tur ngaihtuah reng turin a chah. Beichhua hian November 28 khan Mara Thyutlia Py (MTP) General Conference a hmanpui bakah, Zyhno khuaa Mary Hechia Residential Special School a tlawh bawk.

SBA street play

Sorkar laipui hnuaia North East Zone Cultural Centre leh Mizoram Art & Culture department chuan Swachh Bharat Abhiyan (SBA) pualin November 29, 2019 khan Republic Vengthlangah street play an buatsaih a, lemchan hmangin faina lama inzirtirna an entir. Republic Vengthlang hi Aizawla veng fai zingah a záwnin kum ruk thlan a ni tawh a, chu'ng zinga kum li chu veng fai ber niin, kum hnih dang chu fai ber dawttu an ni.

HBC-ah seminar

Mizoram University-a Department of Psychology leh MZU Psychology Alumni Association chuan November 30, Inrinni khan Hrangbana College-ah 'Contemporary psychosocial issues-II' tih thupui hmangin national seminar an buatsaih. Seminar hi MZU Psychology HoD Prof. HK Laldinpuii Fenate-in a kaihruai a, MZU vice chancellor Prof. KRS Rao khuallian a ni. Seminar-ah hian research paper 36 a lut a, parallel sessions leh presentation-te neih a ni.

MLA-in tlawh

Lunglei North bialtu MLA Dr Vanlalṭanpuia chuan Inrinni khan a bial chhung Haulawng Saichhoh hmuna Horticulture department-in thei chi hrang hrang an enkawlna hmun, Centre of Excellence a tlawh. MLA hi divisional horticulture officer L Lalhmingmawia Pachuau leh project officer JH Zosiamliana ten an hmunhmate fanpuiin, an hnathawh dante an hrilhfiah.

DAWNTISEI

Tihsual hi hlawhchhamna a ni lo, hlawhtlinna kalkawng a ni

Meth mûm 3,03,000 man

Excise & Narcotics department (END)-a Anti-Narcotics Squad chuan November 28 leh 30 khan hmun pahnihah Methamphetamine (Meth) mûm 3,03,000 (kg. 31.5) an man.

END Anti-Narcotics Squad-te chuan November 28, 2019 zan khan Assam Rifles sipaite nen ṭangkawpin Meth mûm 1,01,000 (kg. 10.5) an man a, a neitua puh mi pahnih - F Lalsangkhuma (31) s/o F Siamliana (L), Rih, Myanmar nia inchhál leh Vanlalthuama (36) s/o Songkhawnlata, Serkhan nia inchhálte chu Selesih Vengpuiah an man nghal.

November 28 zana Meth an man thu kal zelah November 30, Inrinni zan dar 10:30 vel khan Anti-Narcotics Squad leh Zuangtui JAC-te chuan Zuangtui Bethel Vengah Meth mûm 2,02,000 (kg. 21) an man leh a; Meth phurhna atana hman car pakhat leh maxicab an man tel bawk.

Methamphetamine an mante hi Myanmar aṭanga lak luh, state danga hralh tur a nih thu a kawltute chuan an sawi. Meth kawltute hi The Narcotic Drug & Psychotropic Substances Act, 1985 (NDPS Act) tlawhchhanin thubuai siamsak an ni a, Special Court (NDPS Act)-ah thawn nghal an ni.

Share this Post

Login to comment

No Comments