KṬP-in Falkland Veng, Aizawla Youth Recreation Centre (YRC) a buatsaih meka Ṭawngtaina In an sak tharte chu November 30, Inrinni khan Central KṬP leader Rev.Dr K Lallawmzuala'n Pathian hnenah hlânin a hawng.

YRC Ṭawngṭaina In hawnna in­khawm hi Ṭawngṭaina Inpuiah neih a ni a, CKṬP assistant leader Upa Rosang­­liana'n a kaihruai. Rev. Dr K Lallawm­zuala chuan, YRC chu Mizoram tan pawha ro tling tur a nih thu sawiin, KṬP member-te'n an hman hma theihna turin project chu hlawm thumah ṭhen a nih thu a sawi a; Kristian ṭhalaite chêttlatna tur a nih avangin ṭawngṭaina hmun siam hmasak a ni chu thil tih âwm tak a nih thu leh, KṬP-te'n ṭangkai taka an hman a beisei thu a sawi bawk.

KṬP General Conference 2018 chuan zângkhai zawka YRC kalpui turin a rêl a, chu chu CKṬP-in bawhzuiin, YRC chu phase pathumah a ṭhen a ni. Phase-I ah ṭawngṭaina in, phase-II ah khelmual leh convention centre leh, phase-III ah auditorium leh parking-te an dah. 

Phase-I, ṭawngṭaina in chu an bawhzui nghal a, November 13, 2018-ah kut an thlâk ṭan. Mi 150 vel len theihna Ṭawngṭaina Inpui, leh ft. 4X6-a lian Ṭawngṭaina Intê 10 an sa zo tawh. Ṭawngṭaina Intê atan hian KṬP branch, bial leh presbytery-te'n sum an thawh (sponsor) a, mimala sum thawh an awm bawk. Ṭawngṭaina Inpui pakhat leh a tê 10 sak nan Rs. 47,34,211 sên a ni.

Share this Post