R Lalzirliana'n zalenna hmang thiam turin ṭhalaite a chah

Hmar Students' Association (HSA) chuan November 30, Inrinni khan Saiphai khuaa HK Dohnuna Hall-ah inkhawmpui lian vawi 57-na an hmang a; khuallian, minister R Lalzirliana chuan, Mizo ṭhalaite chu zalenna hmang thiam tur leh kumina hunpui lo thleng turah fimkhur taka hun hmang turin a chah.

R Lalzirliana chuan, India ram leh Mizorama khua leh tuite'n zalenna an neih chu an ngaih pawimawh a ṭul thu sawiin, "Hmar helte'n inhnûk hniamin lungleng takin an silaite ngai ngawih ngawihin, mittui tla chung­in an fâwp a, ram mipui leh Hmar mipuiin an tlin tawh loh vanga kan unauten silai an tung lai hmutu ka ni a, a lawmawm tak zet a ni. Remna leh muanna kan neih hi a ṭha záwng leh hlâwk zawka hmang thiam turin mipui ka chah che u a ni," a ti a; Hmar hnam chu Mizoram tan a khaipa tur an ni tih hre renga hma la turin a sáwm.

Eng emaw cháng chuan ramin hel neih a mamawh em aw, tia a ngaihtuah ṭhin thu sawiin R Lal­zirliana chuan, "Sorkar officer eiru tam kan hmuh cháng hian hnam hmangaih taka thisena hming ziakte'n hma an lak hi a la ṭulin a ṭha zawk mai em, ka ti ṭhin," a ti. Zirna chungchangah, "Zirna uar zel a, hmasawnna atana thawk zel turin ka chah che u. Rinawmna chhelna leh taimakna kan zir thar a pawimawh tak zet a ni," a ti bawk.

Inkhawmpuia khualzahawm Chaltonlien Amo, MLA, Manipur Assembly-a PAC chairman chuan, zirlaite ram leh hnam nghahfâk an ni tih sawiin, ṭha taka hlawhtlin tuma zir turin a chah a; ram leh hnam hmasawnna atana HSA hna thawh ṭhinte chu chhuanawm a tih thu a sawi. Serlui bialtu MLA Lalrinsanga Ralte pawhin thu sawiin, "Zo hnahthlak hnam hrang hrang ṭawngte humhalh a ṭul. Kan inpumkhatna atana kan ṭawng hman tlanglawn Lusei ṭawng kan thiam tlan a ṭul bawk," a ti. 



Share this Post

Login to comment
No Comments