Lal Thanhawla doctorate degree hlan a ni

Serampore College (University) chuan November 30, Inrinni khan Hyderabad khawpuia Convocation an neihah chief minister hlui leh Mizoram Congress party president Lal Thanhawla chu Doctor of Divinity (honorary doctorate degree) an hlân.

Council of Serampore College (University) chuan Lal Thanhawla hi kohhran leh khawtlang tana a thawh hlâwk avangin D.D hi an hlân a; India ram hmun hrang hranga Kristiante'n tihduhdahna an tawh chángin Kristiante thlavâng hauha hma a lak ṭhin thu te, Kristianna vanga tihduhdah tuar ṭhinte'n an thlamuanpui ṭhin thute an tarlang.

Serampore College (University)-in an tarlan danin, Lal Thanhawla hi India ram, Hindu kulmûk tamna ramah ram hruaitu lawkte zingah Kristian leader chhuanawm tak anga hriat a ni a, India ram hmun hrang hrangah kohhran leh institution hrang hrangte'n an hun pawimawhah an sáwm fo a, Lal Thanhawla pawhin a theihna apiangah a telpui ṭhin. Lal Thanhawla avangin sakhaw dang kara Kristian tlemtê awmte’n ngaih pawimawh an hlawh phah ṭhinah an ngai a, Mizo Kristiante chawimawitu langsar takah an ngai bawk.

Serampore College (University) hi India rama Pathian thu zirna hlun ber, theological college hrang hrangin an zawm (affiliation an tihna) a ni a, Mizorama kohhran hrang hrangte nen pawh nghet taka inzawm an ni.

Inrinnia convocation-ah hian Lalmuanpuii Hmar d/o Chalthangruala, Ramhlun Venglai, Rev. Lalramchhana leh pro. pastor H Joseph Lalfakmawia te pawhin theology-ah Doctor of Philosophy (Ph.D) degree an dawng ve bawk.



Share this Post

Login to comment
No Comments