Mizoram MLA General Election-ah bial 40-ah candidate 174 an awm

November 7, 2023-a Mizoram Assembly General Election neih tura chuh tuma hming pe lutte tana inhnuhdawh theih hun chu nimin tlai dar 3 khan a tàwp a, inhnûkdâwk an awm loh avangin candidate mi 174 an awm dawn tih a chiang ta. Lawngtlai East biala ZPM candidate Dr Lorrain Lalpekliana Chinzah nomination thehluh chu Election Commission of India (ECI)-in a pawm a, a khingpui turte Returning Officer lakah an lungawi lo thung.

Mizoram inthlanpui chuh tur hian MLA nih tumin mi 174-in hming an pe lut a, chu'ngte chu endiknaah pawm vek a ni. Nimin tlai dar 3 thlenga inhnûkdâwk duhte tana hun hawn chhungin inhnûkdâwk an awm lo a, candidate tur chu mi 174 an ni tih a chiang ta a ni.

Hetih lai hian, Lalpa Chhiahhlawh Intelkhawm aṭangin bial pahnih ṭheuh chuh tur mi pali an awm avangin candidate (mihring) zat chu mi 170 an ni thung.

Mizoramah assembly constituency 40 a awm a, chu'ngte chu Congress, MNF leh ZPM party-te chuan an chuh vek dawn a; BJP-in bial 23-ah candidate neiin, Aam Aadmi Party-in bial pali an chuh dawn. Lalpa Chhiahhlawh Intelkhawmin (independent) chuan candidate 17 neiin, bial 21 an chuh dawn a; pawl behchhan nei loa independent-a ding tur mi paruk an awm bawk.

Hetih lai hian, ECI chuan Lawngtlai district-a returning officer Abraham Berazi Khithie aṭanga thu kal angin, ZPM candidate Dr Lorrain Lalpekliana Chinzah chu Lawngtlai East biala din a remti a; ECI chuan a pawm thu hi Mizoram Election department hotute hnenah RO thu anga kaltlang turin ṭawngkain an rawn hriattir a ni.

Dr Lorrain Lalpekliana Chinzah nomina­tion pawm a nih avang hian Lawngtlai East biala BJP candidate NC Muankima, INC candidate H Zothangliana leh MNF candidate H Biakzauva chuan October 22, Pathianni khan thuchhuah siamin, RO chunga an lawm loh thu an tarlang.

Tarlan tawh angin, ZPM hi ECI recognised party a la nih loh avangin thláwptu (proposer) mi 10 an neih a ngai a, Dr Lorrain Lalpekliana hian dan angin proposer mi 10 nei mah se, mi pakhatin a hming a ziah hnan lo a ni. Hei vang hian nomination endik ni October 21, 2023-ah Dr Lorrain-a nomination chu pawm a ni lo a, a tuk October 22 khan endik ṭhat leh a ni a, RO chuan a pawm ta a ni.

Dr Lorrain Lalpekliana Chinzah nomination pawm a nih avang hian a khingpui turte chuan thuchhuah siamin, RO laka an lawm loh thu leh thuneitu sang zawka an kal tur thu an tarlang a, "Dr Lorrain-a nomination paper endik a nih lai hian ECI Handbook for Returning Officer para 5.6.1(ii)-in a phût ang leh Representation of Peoples' Act, 1951 Section 33-in a phût angin proposer 10 neih a ngaih laiin, proposer mi pakua chauhin a nomination paper-ah hming an sign a ni tih hmuh chhuah a ni," an ti.

Candidate pathumte chuan, dan pahnihin a sawi ang leh Handbook for Returning Officer para 6.10.1(v) ang chuan Dr Lorrain Lalpekliana nomination paper chu hnâwl tur a nih thu te, dana chiang taka a inziak chungin RO-in 'Technically chuan ZPM candidate leh a proposer-te thiltih dan a dik tawk lo a...' ti chung siin 'Dan kalh zawnga kan lo rel a nih pawhin, dan thoin min la correct turah ngai ila' tiin a dik lo tih hre chungin a pawm thute an tarlang.

Dan hnuaia dik taka inthlanna kalpui tura ECI-in a ruat RO-in dan a palzút nia sawiin candidate pathumte chuan, "Pawi kan ti a, kan dem tak zet. Chuvangin, keini INC, BJP leh MNF candidate-te chuan dan lo anga min kalpui hi thuneitu sang zawkte hnenah thlenin, dan ang taka election hi conduct a nih theih nan hma kan la dawn a ni," an ti.