Anthurium Festival zawh a ni

Anthurium Festival chu October 21, Inrinni khan Reiek Tourist Resort-ah hman chhunzawm a ni a, a khârna inkhawma khuallian chief secretary Dr Renu Sharma chuan, Festival chuan Mizo hnam ziaráng chawi nun kawngah nasa takin awmzia a neih thu a sawi.

Dr Renu Sharma chuan, Best Tourism Village in India, 2023 lawmman dawngtu Reiek khuain Anthurium Festival a thleng chu inhmeh a nih thu a sawi a, "Anthurium Festival hi Mizoram chhung hmun hrang hrang bakah Mizoram páwn aṭanga khualzin hîptu pawimawh tak a ni ṭhin a, Mizo hnam hrang hrang nunphung leh ziaráng pho chhuah hian Mizo hnam ziaráng chawi nun kawngah nasa takin awmzia a nei a ni," a ti.

Mizoram chu khualzin hîptu pawi­mawh a nih thu sawiin Renu Sharma chuan, "Hnam dangte lo dawnsawn danah hma kan sawn zel. India ram state hrang hrang bakah khawvel ram hrang hrangah tourism industry hi a pawimawh a, ram economy-ah pawh thawh hlawk tak a ni," a ti a, nasa leh zuala ṭan lak a pawimawh thu a sawi bawk.

Anthurium Festival-ah hian lâm leh zai te, Mizo infiamna chi hrang hrang hrangte entir a ni.