Children's Science Congress zawh a ni

Science Teachers Association Mizoram (STAM) leh Samagra Shiksha, Mizoram chuan October 18-19, 2023 chhung khan School Education conference hall-ah state level Children's Science Congress vawi 31-na an buatsaih a; zirlaite'n project an siamte an entir a, India ram pum huap intihsiaknaa tel tur project ṭha 10 thlan a ni.

Children's Science Congress-ah hian district level intihsiaka ti ṭhate an tel a, district 11 aṭangin science project 41 hmangin zirlaite an intihsiak a, thupui chu 'Understanding ecosystem for health and well-being' tih hman a ni.

India ram pum huap intihsiakna, National Children's Science Congress leh Indian Science Congress-a tel turin project ṭha 10 thlan a ni.

Intihsiakna hi IIT, Gan­d­hinagar-a assistant professor Dr Krista Roluahpuia, MZU ICMR-NARI scientist-B Dr Rita Zomuanpuii leh Pachhunga University College-a assistant professor Dr K Vanlaldinpuia te'n an endik. Child scientist-te tan 'Meet the scientist' hun hman niin, Mizoram University-a Zoology department Prof. HT Lalremsanga nen zirlaite an inkâwm.

Children Science Congress khàrna inkhawma khuallian Prof. H Lalthanzara, PUC principal chuan, child scientist-te chu taima leh chhel taka an zir zel chuan scientist ropui tak an nih theih thu a hrilh a, "Mi hlawhtling ni turin sikul ṭha ber berah kal kher a ngai lo a, tuna in sikul kalna ṭheuhte hi ngainêp lo a, taima leh chhel taka in zir zel chuan mi hlawhtling tak in ni thei," a ti.

PROJECT ṬHA ZUAL THLANTE
▶ Deborah Lalnunchami, Don Bosco School, Lawngtlai
▶ H Zarzothanga, Khawzawl Middle School-II
▶ Lalremtluangi Ralte, Bethlehem Vengthlang H/S, Aizawl
▶ Mercy Lalawmpuii, Synod HSS, Aizawl
▶ Lalrotluangi, Pangzawl High School. Hnahthial District.
▶ Sarah Lalrinkimi, HT High School, Kolasib
▶ Lalhmangaihsangi, Saitual High School
▶ J Malsawmzuali, Bethel Mission School, Champhai
▶ Tiffany Zomuanpuii, Modern English HSS, Aizawl
▶ Hannah Lyno, New Light School, Tipa, Siaha