Election observer-in Serchhip a tlawh

Village council inthlan tura State Election Commission-in Serchhip district tana observer tura a ruat Robert C Lalhmangaiha chuan nimin khan Ser­chhip DC conference hall-ah political party, MPF leh tlawmngai pawl aiawhte leh thuthar thehdarhtute a kâwm.

Robert C Lal­hmangaiha chuan, VC inthlan tura inpuahchahnaah Serchhip district-a thawktute chu an ti ṭha hlea a hriat thu a sawi a, "District Election office inbuatsaihnate ka tlawh tawh chin, Hrangturzo biala khaw hrang hranga inbuatsaihnate a ṭha tâwk hlein ka hmu," a ti.

Páwl hrang hrangte chu inthlan turah felfai leh thianghlim taka inthlanna a awm theih nan thawhpuiah sáwmin Rober C Lalhmangaiha chuan, "Covid-19 laka kan him theihna tura sorkar ruahmannate zawm ṭhat a ṭul," a ti a; Serchhip district-a Assembly constituency pathum chu tlawh kual vek a tum thu a sawi. Páwl hrang hrangin zawhna an neihte chu Observer leh amah ṭawiawmtu Election officer Vanlalhmachhuana ten an chháng a ni.