Comprehensive Model School, Model Veng chuan November 6, Nilaini khan an kum 50-na, golden jubilee an lawm a, School Education minister Lal­chhandama Ralte-in a hmanpui.

Lalchhandama Ralte chuan, Comprehensive Model School-in golden jubilee a thleng thei chu a lawmpui thu sawiin, "Hlim taka jubilee kan lawm rual hian, kumin hi kan exam result ṭhat ber kum a ni ang em tih erawh kan ngaihtuah a ngai," a ti. Hranghluite'n fa duhawm tak tak an hring chhuak tawh angin, tuna mite'n model nihna an vawng nung reng em tih te, sorkar hmalakna thláwptu leh sorkar hmun­hmate mahni ta anga entu leh venghimtu an ni em tihte inenfiah a, mi dang tana model (entawn tlak) ni zel turin Model School-a thawkte a chah.

Khualzahawm Esther Lalruatkimi, School Education secretary pawhin thu sawiin, Comprehensive Model School chu lehkha a zir ve tawhna ṭhin a nih thu sawiin, golden jubilee an thleng chu a lawmpui thu a sawi a; "Kan ram zirna siamṭha tur leh zirnaa hlawhtlinna tak tak nei turin zirtirtute leh zirlaite'n Pathian dah pawimawh a, tum mumal neia hma lam kan pan a ngai a ni," a ti.

Comprehensive Model School hi English medium school a ni a, March 7, 1969-ah din a ni. Tunah hian KG I aṭanga pawl 10 thleng zirna a awm a, zirlai 300 leh zirtirtu 30 an awm mek a ni.

Share this Post