Jats hoin nawrh titawp duh lo

Haryana-a Jats hnam hoin OBC hnuaia an hnam puala quota pek phuta nawrh an huaihawt chu sorkarin ngaihtuah tiam mah se an la titawp duh lo.

Chief Minister Manohar Lal Khattar chuan Jats hnam thil phut hi ngaihtuah tiam mahin all party meeting a ko a, mahse Jats hnam chuan sorkarin ziaka a tiam ngei loh chuan nawrh an titawp dawn lo tih an sawi.

Jats hnam hian ni ruk zet nawrh an huaihawt tawh avangin state chhung rel leh motor tlan vel pawh a bahlah phah hle a, zirna in tam tak khar a ni bawk. Sorkar thuneitute chuan nawrh huaihawtna hmun, Rohtak, Sonepat leh Panipat bialah internet leh mobile SMS service te a titawp.

All India Jat Aarakshan Sangarsh Samiti national president, Yashapal Malik chuan, " Kan thil phut tihhlawhtlin a nih hma chuan kan nawr zui zel dawn a, nawrh hi state chhung hmun dangah pawh neih zel kan tum a ni" a ti. Haryana-a BJP sorkar chuan budget session neih turah OBC category-ah Jats te dahna tur bill put luh a, an pass nghal ngei an phut tih a sawi.

Jats nawrh huaihawtna hmuna tharum thawhna a thlen vang leh, state chhung hmun
ṭhenkhata mobile internet leh SMS service tihtawp a nih avangin Punjab and Haryana high court chuan state sorkar hnenah state chhung dinhmun report turin a hriattir tawh bawk.