Vanglaini - Annual Art Exhibition buatsaih ṭan

KHAWTHLIR

AR hotupa leh CYMA inkawm

Assam Rifles 23 Sector DIG Brig. Vinod S chuan nimin khan an hmunah Central YMA hruaitute léngah sáwmin, Mizo ṭhalaite tana an hmalakna hrang hrang a hrilh. Brig. Vinod S chuan, sipai lâk leh turah Mizo ṭhalai tan pre-recruitment an buatsaih thu sawiin, chu'ngte chu puanzarsak turin a ngen. CYMA hruaitute chuan, Mizoram aṭanga Rihdil tlawh turte'n Zokhawthara Assam Rifles-te laka harsatna an tawh ṭhinte enfiah ni se an duh thu, Brig. Vinod S chu an hrilh ve bawk.

Bru Convention

Zanin aṭang hian Damparengpui, Mamit district-ah Home Mission North Bru Convention vawi 4-na neih a ni dawn a, Pathianni zanah a ṭiak ang. Inkhawmpuia thupui tur chu 'Ringtu nun' tih a ni a, speaker tur chu H Lalṭanpuia, Kraws Fate Team a ni ang.

Lusún khawhar

Thangrikhumi (83) w/o C Lalkhawliana, Chanmari, Aizawl chu nimin chhun dar 10:55 khan a thi a, vawiinah an chennaah vui a ni ang. Thangrikhumi hi chanchinbu lamah nasa taka inhmang ṭhin a ni a, a pasal C Lalkhawliana hi Mizorama prominent journalist mi tlemtê zinga mi niin, sap ṭawng chanchinbu Highlander editor leh publisher a ni.

PMMVY sawiho

Nimin khan Lawngtlai DC pisa conference hall-ah Lawngtlai additional DC B Lalchhawntluanga hoin District Level Steering & Monitoring Committee on Pradhan Mantri Matru Vandana Yojana (PMMVY) an ṭhukhawm a; Social Welfare department aiawh te, Chief Medical Officer aiawh, bank hrang hrang aiawhte leh common service centre neitute an tel. PMMVY hi nu leh nausen thihna tihtlemna tura hmalakna a ni a, August 2018 aṭanga kumin October thla thleng khan Lawngtlai district-ah mi 1,046-in PMMVY ṭanpuina an dawng tawh a, chuta tan chuan Rs. 41,45,000 pek a ni.

CEM-in hawng

Mizoram Football Association (MFA) leh Siaha District Football Association (SDFA)-te chuan nimin aṭang khan Siaha District khelmualah Inter-District Women's Football Tournament 2019 an buatsaih ṭan a, MADC chief executive member N Zakhai-a'n a hawng. CEM hian SDFA ṭanpui nan Rs. 20,000 a hlân nghal a ni.

DAWNTISEI

Annual Art Exhibition buatsaih ṭan

IPR department leh Mizoram Art Development Society (MADS) chuan nimin khan Aijal Club-ah Annual Art Exhibition an buatsaih ṭan a, IPR director Lallianpuii’n hawng.

IPR Director chuan, artist-te chu Pathian thil siam ropui tak takte mawi taka pho chhuak ṭhintute an nih thu sawiin, "Mipui vantlangin an ngaihtuah leh suangtuah phâk loh thil an ngaihtuah a, mawi tak takin an pho chhuak ṭhin a ni," a ti a; Mizo lemziak thiamte kutchhuak pho chhuahna art exhibition New Delhi-a neihin rah ṭha a chhuah thu sawiin, nakkum tìr lamah Kolkata-ah art exhibition nei turin ruahmanna kalpui mek a nih thu a sawi.

MADS-ah hian member 80 chuang an awm a, kum 2013 aṭangin IPR department nen ṭang dunin kum tin November thlaah annual art exhibition an buatsaih ṭhin. Tuna Annual Art Exhibition an buatsaih mek chu November 13, 2019 thleng neih tur niin, lemziak thiam mi 38 leh lem tuk thiam pakhat kutchhuak hrang hrang 78 pho chhuah a ni. A duh apiang tan chawhma dar 10 aṭanga tlai dar 5 inkarah tlawh theih a ni.

Share this Post

Login to comment

No Comments