Vairengte High School chuan nimin khan an sikul din champha vawi 50-na, golden jubilee an lawm a, bialtu MLA Lalrinsanga Ralte, Rubber & Allied Crops Development Board vice chairman-in a hmanpui. MLA chuan, academic season thar aṭangin Vairengte-ah science subject zirna higher secondary school hawn a nih tur thu a sawi.

Lalrinsanga Ralte chuan, chief minister Zoramthanga kaihhruai MNF ministry-in Mizoram zirna hmasawnna turin nasa takin hma an la nia sawiin, "Mizo zirlaite'n thiamna sang leh ṭha zawk, dinhmun duhawm an chan theih nan theihtawp a chhuah mek zel a ni. Thingtlang lamte'n zirna ṭha zawk an dawn theih nan ruahmanna hrang hrang siam mek a ni. Education minister Lal­chhandama Ralte ruahmannain season thar aṭangin Vairengte khuaah higher secondary school science zirna hawn a ni dawn," a ti.

Serlui Bialtu MLA chuan Vairengte chu ramri depa awm a nih thu sawiin, "Kan ramri vengtu leh humhimtu pawimawh tak in ni a, ramri hi kan veiin kan ngai pawimawh tur a ni. Kan ram hi venghima humhim tur chuan Mizo a tam thei ang ber central service/all India service-ah kan luh a ngai," a ti a; Mizorama sorkar department hrang hrang hotuah Mizo pa ngei awm thei se a duh thu sawiin, chumi tur chuan ram leh hnam veina rilru pu chunga zirlaite'n an zir a ngaih thu a sawi.

Vairengte H/S golden jubilee lawm nan hian nimin khan ruai an ṭheh a ni.

Share this Post