MNA Khuangchera Bn. din champha lawm

MNF-in Mizoram zalênna an sual laia Mizo National Army (MNA)-a Khuangchera Battalion-te chuan nimin khan Central Nursery, Sairangah an din champha vawi 52-na an lâwm a, govt. deputy chief whip Lalrintluanga Sailo, MLA-in a hmanpui.

Lalrintluanga Sailo chuan, khawi hmunah pawh awm se, Delhi tlang thleng pawha Mizoram tana zalenna sualtu nih zak miah lo a nih thu sawiin, "Miin ram tan theihtawp an chhuah a nih chuan, chu chu an chhuang tur a ni. Ram tana kan feh chhuah avang­in lehkha kan zir hman lo a, zirna hun nei ila, kan thiam ve tho ang. Hnam dang bulah, mi thiam zawkte bulah kan awm a nih pawhin kan inzahpui tur a ni lo, ram zalenna sualtu kan nihna hi kan chhuang em em zawk tur a ni," a ti.

Khuangchera Bn hi May 20, 1965-ah Maj. Lalnghinga hoin Lung­leiah din a ni a, silai kenga zalenna sual hnuah November 7, 1967-ah MNA hnuaiah Lt.Col. Chuaudinga hoa din thar leh a ni. 'K' Battalion-ah hian mi 522 an inziak lut a, an zinga mi 57 chu an rammut laiin an thi a, kum 1986-a remna avangin mi 63 an haw a ni.



Share this Post

Login to comment
No Comments