Tuipui khuain Tomato Kût an hmang

Tuipui khuaa Tomato Growers Society chuan Horticulture department nen ṭang dunin nimin khan an khuaah Tomato Kût leh Vangpui Day an hmang. Kût pual hian an khaw paltlangtu khualzinte chu a thlawnin tomato an pe.

Kût hmanpuitu Horticulture Development Board vice chairman Prof. F Lalnunmawia, MLA chuan, Tuipui khawtlangin hlawhtling taka tomato an thar theih chhan chu khaw mite leh Horticulture department thawhho 

ṭhat vang a nih thu sawiin, "Horticulture Development Board hian thei leh thlai thar tihpun a, state dang aṭanga thei leh thlai lak luh ngai loa intodelh chu a tum ber a ni," a ti a; Tuipui khaw mite chu tomato tam zawk thar tum zel turin a chah.

Khualzahawm Dr ZR Thiamsanga, MLA pawhin thu sawiin, Tuipui khawtlang chu Mizoram huap pawhin entawn tlak an nih thu a sawi a, "Mizoram intodelhna turin agriculture leh horticulture a pawimawh. Intodelh turin taimâk a pawimawh a, sorkara innghat ngawt ni lo, a thawha thawk tak taka taimak a ṭul. Taima taka thawkte chu sorkar pawhin a ngai pawimawh a ni," a ti.

Tomato Kût puala inkhawm buatsaih hi Tuipui V/C president Rinsangpuia'n a kaihruai a, Horticulture director Dr Elizabeth Saipari'n Tuipui khuaa an hmalakna hrang hrangte a sawi.

Champhai bul lawka awm Tuipui khuaah hian chhungkaw 65-in tomato an chíng a; kuminah tomato grade A quintal 1,200 leh grade B quintal 480 an thar a, tomato an hralhna aṭangin kuminah Rs. 57,00,000 an hmu tawh. Kum 2017 aṭanga nimin thleng khan tomato an hralhna aṭangin Tuipui khaw mite'n sum an hmuh zawng zawng chu Rs.1,59,38,000 a tling tawh a ni.

Kut puala inkhawm buatsaih hmain Khuallian hoin tomato an seng



Share this Post

Login to comment
No Comments