CYMA hnuaia ruihhlo dotu SRS tihtawp rih a ni

Central YMA hnuaia ruihhlo dona lama hma latu, Supply Reduction Service (SRS) chu tihtawp rih a ni. SRS din leh a nih dawn leh dawn loh chu YMA Central Executive Committee (CEC)-in a la ngaihtuah dawn.

Vanglaini palai zawhna chhangin CYMA president Vanlalruata chuan, SRS batch kal meka awmte chu an term a tàwp tawh avangin din thar a la ni rih lo tih a sawi a, "CEC-in SRS chungchang hi a la ngaihtuah leh turah ka ngai. Committee-in ṭha a tih chuan din leh a ni ang a, din leh ṭha a tih tawh loh chuan din a ni tawh lo ang," a ti.

SRS hi hun eng emaw chen din a nih loh hnuah CYMA CEC chuan April 6, 2015 khan din thar leh turin thutlukna a siam a, April 11, 2015 aṭangin SRS hmangin ruihhlo do beihpui an thlak ṭan leh a ni.

SRS hi hun bituk (term) neia din a ni a, term thar apiangah convener thar ruat a ni ṭhin. SRS batch hnuhnung berte chu October 15, 2019 khan an term a tawp tawh a ni.



Share this Post

Login to comment
No Comments