Pension buaipuina tur hawng

Computer hmanga awlsam leh chak zawka pension siamna tura ruahman, Pensioner’s Database Management System (PDMS) chu nimin khan Account & Treasuries conference hall-ah Finance minister Lalsawta'n a hawng.

Lalsawta chuan PDMS ṭangkaina tur sawiin, "Dik leh felfai zawk, rang leh hahdam zawk bawk siin thawktu tlem zawk hmangin pension hi kan chingfel thei zar zar tawh dawn. PDMS hnuaiah chuan file hlui sang tél, rit tak tak kha awm tawh loin, file tlêmtê chauh hmangin hna a thawh theih tawh ang," a ti.

PDMS hawnna inkhawm hi Finance commissioner LN Tochhawng-in a kaihruai a, chief controller of accounts R Lalbiakthanga'n PDMS an siam dan a sawifiah.

PDMS hi 13th Finance Commission-in pensioner leh family pensioner-te database siamna tura sum a pek hmanga siam a ni a; Kolkata-a Spectra Consultancy leh Accounts & Treasuries department-in Mizorama pension kalphung mil turin an duang a ni.

Pension file hlui digitization pawh kalpui mek niin, tunah hian pension file 4,173 digitized tawh a ni a; August 25, 2015 aṭanga pension case lut thar apiang chu PDMS hmanga tihfel niin, tunah hian case 323 chinfel a ni tawh.